Biznesmeni Valter Lavitola dhe Clesio Gomez Tavares janë arrestuar nën dyshimin se kanë organizuar sulmin me eksploziv ndaj gazetarit dhe prezantuesit të emisionit “Report” të RAI-t, Sigfrido Ranucci.
Lavitola u arrestua nga karabinierët në zonën e Trasteveres në Romë, ndërsa Tavares, i cili ndodhet jashtë Italisë, është shpallur në kërkim. Sipas urdhrit të gjyqtarit hetues të Romës, Lavitola dyshohet se ka hartuar planin kriminal dhe ka koordinuar përgatitjet për sulmin.
Sipas gjyqtares hetuese të Romës, Iole Moricca, motivi i sulmit lidhet me marrëdhënien personale mes Lavitolës dhe Ranuccit.
Në një urdhër prej 198 faqesh, gjyqtarja argumenton se plani kishte një objektiv të dyfishtë, nga njëra anë, të krijonte perceptimin se Ranucci ishte një figurë që duhej mbrojtur, dhe nga ana tjetër, të rriste popullaritetin e gazetarit dhe ta shtynte atë drejt një karriere politike.
Hetimi nuk ka gjetur prova se Ranucci ishte në dijeni ose kishte rënë dakord me planin. Përkundrazi, sipas gjyqtares, gazetari ishte viktimë e manipulimit dhe kishte reaguar me tronditje dhe mosbesim kur mësoi për përfshirjen e dyshuar të mikut të tij.
Në qendër të hetimit janë mesazhet e gjetura në telefonin e Lavitolës dhe përgjimet e shumta të analizuara nga hetuesit. Sipas urdhrit të arrestimit, Lavitola kishte tentuar prej kohësh ta bindte Ranuccin të largohej nga gazetaria dhe të hynte në politikë.
Në një mesazh të 29 korrikut 2024, Lavitola i kishte sugjeruar Ranuccit se ishte koha të largohej nga gazetaria. Në një tjetër, të datës 26 qershor 2025, ai i shkruante se sulmet ndaj gazetarit mund të shërbenin për të rritur popullaritetin e tij.
Hetuesit dyshojnë se Lavitola e shihte një sulm ndaj Ranuccit si një mënyrë për ta forcuar më tej profilin e tij publik dhe për ta shtyrë drejt një kandidimi politik.
Në një tjetër bisedë të cituar në urdhrin e gjykatës, Lavitola dyshohet se i kishte folur një bashkëbiseduesi për planet për ta bindur Ranuccin të kandidonte për një post të lartë politik.
Sipas tij, gazetari mund të shndërrohej në një figurë shumë të rëndësishme politike pas një sulmi, duke pretenduar se një skenar i tillë do t’i rriste ndjeshëm mbështetjen publike.
Në vitin 2024, Lavitola i kishte thënë gjithashtu Ranuccit se ai mund të ishte një prej figurave të pakta politike të qëndrueshme në Itali dhe i kishte sugjeruar se, pas dy vitesh, mund të bëhej president.
Sulmi ndaj Ranuccit ndodhi në tetor 2025 në Pomezia, pranë Romës. Një pajisje shpërthyese artizanale u aktivizua pranë banesës së gazetarit.
Në fund të qershorit, hetimi çoi në arrestimin e katër personave, tre burra dhe një grua, të dyshuar si autorët materialë të sulmit.
Ata akuzohen për vepra që lidhen me posedimin dhe përdorimin e një pajisjeje shpërthyese, kërcënime dhe dëme, me rrethana rënduese të lidhura me mënyrën e organizimit të krimit.
Sipas masës paraprake, Lavitola dyshohet se ka hartuar planin dhe i ka dhënë Tavaresit detyrën për të identifikuar persona që mund të siguronin eksplozivët dhe të kryenin sulmin.
Tavares dyshohet se ka vepruar si ndërmjetës dhe koordinator operacional, duke rekrutuar dhe trajnuar personat që më pas kryen sulmin.
Ai dyshohet gjithashtu se mori pjesë në një tjetër inspektim të zonës më 10 tetor 2025. Tavares është larguar nga Italia dhe besohet se ndodhet në Kamerun, ndaj autoritetet kanë lëshuar urdhër për arrestimin e tij.
