Irani e shfrytëzoi periudhën e armëpushimit 60-ditor për të forcuar kapacitetet e tij ushtarake dhe për t’u përgatitur për një përshkallëzim të ri të konfliktit me Shtetet e Bashkuara dhe Izraelin, sipas një raportimi të Wall Street Journal.
Sipas raportit, udhëheqja iraniane nuk e konsideroi memorandumin e mirëkuptimit të nënshkruar me SHBA-në në qershor si fundin e konfliktit. Përkundrazi, zyrtarët e vijës së ashpër në Teheran dyshohet se vendosën që në ditët e para të armëpushimit të përgatiteshin për një tjetër përballje ushtarake.
Sipas burimeve arabe dhe iraniane të cituara nga WSJ, pas nënshkrimit të marrëveshjes, drejtues të lartë iranianë zhvilluan takime për të përcaktuar strategjinë e re. Në qendër të saj ishte forcimi i Gardës Revolucionare, rikthimi i disa komandantëve me përvojë nga lufta Iran-Irak në pozicione të rëndësishme dhe përshpejtimi i prodhimit të raketave dhe dronëve.
Raporti pretendon gjithashtu se Irani e shfrytëzoi armëpushimin për të rritur presionin ndaj SHBA-së dhe aleatëve të saj në rajon.
Sipas burimeve të cituara, forcat e lidhura me Teheranin ndërmorën veprime kundër anijeve në Ngushticën e Hormuzit dhe zgjeruan operacionet përmes Huthëve në Detin e Kuq.
Qëllimi, sipas raportimit, ishte rritja e kostos së përfshirjes amerikane në konflikt dhe krijimi i një pozicioni më të favorshëm për Iranin në rast të rifillimit të luftimeve.
Agjencitë arabe të inteligjencës, sipas WSJ, kanë mbledhur informacione që pretendohet se tregojnë për një strategji të tillë. Mes tyre janë komunikime të Teheranit me grupe dhe forca të armatosura aleate në Irak dhe Jemen.
Zyrtarët amerikanë, bazuar në këto informacione, kanë paralajmëruar disa vende të rajonit për mundësinë e sulmeve të reja iraniane. Kuvajti raportohet të jetë ndër vendet që ka marrë paralajmërime për një rrezik të mundshëm ndaj objektivave që Teherani mund t’i konsiderojë “territor armik”.
Raportimi vjen në një moment të ndjeshëm, pasi afati 60-ditor i armëpushimit SHBA-Iran ka përfunduar pa një marrëveshje përfundimtare.
Nëse pretendimet e raportuara nga WSJ konfirmohen, kjo do të nënkuptonte se Teherani e ka përdorur periudhën e armëpushimit jo vetëm për negociata, por edhe për të riorganizuar forcat dhe për të rritur kapacitetet ushtarake në pritje të një konflikti të ri.
