Shqipëria do të marrë deri në fund të muajit mars pjesën e financimit që lëvrohet automatikisht nga Plani i Rritjes i Bashkimit Europian.
Delegacioni i BE-së në Tiranë iu përgjigj interesimit të RTSH-së për afatet e lëvrimit të këtyre fondeve, duke kujtuar se “Plani i Rritjes përfaqëson një ofertë gjithëpërfshirëse të BE-së për Ballkanin Perëndimor për të nxitur progresin dhe për të reduktuar hendekun e zhvillimit midis Shqipërisë dhe BE-së”.
“Qëllimi i tij është të plotësojë dhe përshpejtojë procesin e anëtarësimit në BE. Plani mbështetet nga një instrument i ri financimi i bazuar në performancë, Faciliteti për Reforma dhe Rritje,” thuhet në përgjigjet e delegacionit europian.
Në përgjigjen zyrtare, fondet e quajtura “Brenda Planit Parafinancim” dhe përkatësisht 7 për qind ose 61 milionë e 922 milionë euro që i takojnë Shqipërisë, pritet të realizohen brenda muajit mars.
“Ashtu si vendet e tjera të Ballkanit Perëndimor dhe pas miratimit të Agjendës së Reformës, Shqipëria do të marrë 7 për qind parafinancim. Shqipëria është në proces të përfundimit të miratimit të brendshëm të Marrëveshjes së Facilitetit dhe Marrëveshjes së Huasë, duke përfshirë ratifikimin e saj nga Kuvendi i Shqipërisë. Jemi në kontakt të vazhdueshëm me Qeverinë e Shqipërisë për të finalizuar parafinancimin që pritet deri në fund të marsit 2025,” sqaron delegacioni europian në Shqipëri.
Paketa e përgjithshme për gjashtë vendet e Ballkanit Perëndimor – Shqipërinë, Kosovën, Maqedoninë e Veriut, Serbinë, Bosnjë-Hercegovinën dhe Malin e Zi – kap shumën prej 6 miliardë eurosh dhe mbulon periudhën 2024–2027.
Brenda saj, një tjetër kushtëzim lidhet me veprimin e vetë vendeve për të përmbushur përfitimin e 2 miliardë eurove grante nga BE-ja pa kthim, ndërsa pjesa tjetër në formën e kredive të favorshme.
Siç u tha në paraqitjen e parë të këtij plani, vendeve të rajonit u është thënë qartë se shuma do t’u shpërndahet vendeve të tjera nëse nuk shihen rezultate në kryerjen e reformave pas një ose dy vitesh.
