Ministria e Shëndetësisë ka shpërndarë një komunikatë për shtyp, me të cilën është bashkëngjitur një kopje e gjurmimit të ambulancës që shkoi për të marrë të plagosurin te “Çajupi”. Komunikata ka ardhur në përgjigje të lajmeve të mëhershme për vonesë të ambulancës deri në 20 minuta pas marrjes së njoftimit.
Ja komunikata e Ministrisë:
Në shkrimin me titull: “Plagosja te “Çajupi”, çastet e tmerrit, ambulanca erdhi me 20 minuta vonesë”, të botuar sot (21/09/2016) në portalin informativ online “Balkanweb.com” raportohet se autoambulancës së shërbimit të urgjencës mjekësore i janë dashur 20 minuta për të mbërritur e për t’i ardhur në ndihmë një shtetasi pranë shkollës “Çajupi”.
E vërteta është krejt ndryshe.
Siç edhe mund të verifikohet fare lehtësisht nga dokumentacioni i shërbimit të urgjencës dhe regjistrimi elektronik nëpërmjet sistemit GPS të aktivitetit të lëvizjes në terren të autoambulancës “TR 9916 K Urgjenca e Tiranës”, thirrja për t’i ardhur në ndihmë personit në nevojë është marrë nga centrali i shërbimit të urgjencës mjekësore në orën 12:33 dhe orari i mbërritjes së autoambulancës te vendodhja e personit në nevojë shënon kohën 12:41.
Pra, siç mund të shihet qartësisht, autoambulancës i janë dashur vetëm 8 minuta dhe jo 20 minuta, siç raportohet në shkrimin e sipërpërmendur, për të mbërritur në vendodhjen e personit në nevojë pas marrjes së thirrjes.
Bashkëlidhur njoftimit, do të mund të gjeni kopje elektronike të praktikës së gjurmimit me sistemin GPS të instaluar brenda autoambulancës për rastin në fjalë.
