Policia e Tiranës ka identifikuar dhe proceduar penalisht tetë të mitur, të moshës 13 deri në 15 vjeç, të dyshuar si të përfshirë në konfliktin ku mbeti i plagosur lehtë një turist 20-vjeçar italian.
Ngjarja ndodhi më 29 korrik 2026, pranë Pallatit të Kulturës në Tiranë, ku i riu italian pësoi lëndime të lehta trupore pas një konflikti.
Sipas Policisë, menjëherë pas ngjarjes u kryen veprime intensive hetimore, të cilat çuan në identifikimin, shoqërimin dhe procedimin në gjendje të lirë të tetë të miturve, të moshës 13-15 vjeç, të dyshuar si pjesëmarrës në konflikt.
Blutë bëjnë me dije se hetimet vijojnë për identifikimin e personave të tjerë që dyshohet se kanë qenë të përfshirë në ngjarje, si dhe për dokumentimin e plotë ligjor të rastit.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Tiranë, e cila do të vijojë me veprimet e mëtejshme hetimore.
