Detaje të reja janë zbardhur nga ngjarja e ndodhur pas mesnate në zonën e Shkozës në Tiranë, ku mbeti i plagosur me armë zjarri efektivi i policisë Anxhelo Kumaraku.
Burime pranë grupit hetimor bëjnë me dije se në momentin e atentatit, Kumaraku ndodhej pranë banesës së tij i shoqëruar nga një komshi, i cili rezulton të jetë person me masë sigurie “arrest shtëpie” për armëmbajtje pa leje.
Sipas dyshimeve paraprake, objektiv i atentatit dyshohet të ketë qenë pikërisht komshiu i efektivit. Dyshohet se ngjarja mund të lidhet me prishje pazaresh droge me persona të tjerë.
Po ashtu, mbetet ende e paqartë përse efektivi i policisë shoqërohej me personin që ndodhej në “arrest shtëpie”, ndërsa nga hetimet rezulton se ky i fundit kishte thyer masën e sigurisë në momentin e ngjarjes.
Burimet bëjnë me dije se efektivi i plagosur nuk kishte njoftuar strukturat policore për shkeljen e masës së sigurisë nga komshiu i tij.
Ndërkohë, Anxhelo Kumaraku ndodhet në spital jashtë rrezikut për jetën, ndërsa grupi hetimor dhe Agjencia e Mbikëqyrjes Policore vijojnë hetimet për identifikimin e autorëve dhe zbardhjen e plotë të ngjarjes.
