Sherri i 5 ditëve më parë ka çuar në plagosjen e tre personave në Durrës. Elvis Kurti, i plagosur me dy plumba mësohet se është nipi i një biznesmeni në qytetin bregdetar. Burimet policore kanë bërë me dije se serri ka ndodhur pasditen e djeshme prapa Pallatit të Kulturës, në lagjen nr 11.
Siç raporton GSH, pas sinjalizimit për plagosjen e tre shtetasve, blutë kanë shkuar menjëherë në vendin e ngjarjes dhe kanë nisur hetimet. Sipas hetuesve të çështjes, në konflikt është përfshirë dhe Elton Hoxha. Nga kryerja e veprimeve hetimore paraprake ka rezultuar se ngjarja ka marrë shkas pas një konflikti të disa ditëve më parë mes Elvis Kurtit dhe Ervin Qerimit. Po të njëjtat burime deklaruan se janë ndaluar të katër personat në fjalë.
Si ndodhi ngjarja
Rreth orës 13:00, Ervin Qerimi së bashku me Eloert dhe Elton Hoxhën (këta dy të fundit persona me precedentë të mëparshëm penalë) kanë shkuar afër banesës së Elvis Kurtit dhe e kanë thirrur që të zbresë poshtë. Sipas bluve, sapo Kurti është afruar, ka nisur sherri mes palëve. Fillimisht ata kanë debatuar ashpër dhe më pas sherri ka degjeneruar në përleshje.
Mësohet se në përleshje e sipër (sipas policisë), Kurti është qëlluar me armë zjarri nga Ervin Qerimi dhe për pasojë është plagosur rëndë me dy plumba (një në shpatull dhe një në qafë). Ndërsa, janë plagosur me thikë Qerim dhe Eloert Hoxha. Të tre të plagosurit janë dërguar urgjentisht në spitalin rajonal të Durrësit, ku iu është dhënë ndihma e parë mjekësore.
Hetimet për ngjarjen
Pas kryerjes së veprimeve hetimore paraprake, burime pranë grupit hetimor deklaruan se konflikti midis të rinjve ka nisur pesë ditë më parë. Mësohet se nipi i biznesmenit, Elvis Kurti kishte blerë një apartament të ri (10 metra larg vendit ku ndodhi përleshja dje), ndërsa i kishte kërkuar Ervin Qerimit që t;i dërgonte hidrosanitaret dhe t;i vendoste ato. Qerimi ka shkuar tek apartamenti i Kurtit, por pas një zënke është goditur nga ky i fundit me grusht dhe ka përfunduar në spital.
Policia e ka marrë në pyetje, por Qerimi nuk ka bërë denoncim, madje ka dhënë deklaratë se nuk ka asnjë problem me Kurtin. Ndërkaq, dje Ervin Qerimi ka marrë dy shokët e tij dhe ka shkuar pranë shtëpisë së Elvis Kurtit. Pranë dyqanit të kafesë ata janë përleshur fizikisht, dhe më pas Ervin Qerimi ka qëlluar me armë zjarri në drejtim të Kurtit, ndërsa ky i fundit ka goditur atë me thikë dhe shokun e tij, Eloertin. Policia e Durrësit është duke hetuar intensivisht për zbardhjen e plotë të kësaj ngjarjeje.
BW
