Gjykata e Lezhës ka caktuar masën e sigurisë “arrest me burg” për Gjergj Gjinin, autorin e plagosjes së fqinjit të tij pak ditë më parë në Balldre.
Ai ka pohuar sot në gjykatë se ka pasur konflikte të vazhdueshme pronësie me Hilë Gjinin, por ka thënë se qëllimi i tij nuk ishte për ta vrarë.
“I zura pritë për ta trembur më shumë, nuk kisha qëllim që ta vrisja. Kemi pasur konflikte të vazhdueshme pronësie me Hilën, pa mundur t’i zgjidhnim”, – tha 69-vjeçari.
Hilë Gjini është qëlluar nga 69-vjeçari me armë zjarri në momentin që ndodhej në makinë me gruan dhe fëmijët, për t’i dërguar këta të fundit në shkollë.
Ngjarja, e cila ndodhi mëngjesin e kësaj të marte, mund të kishte kthyer në një tragjedi, nëse bashkëshortja e 43-vjeçarit së bashku me fëmijët nuk do t’ia kishin hequr armën nga dora Gjergji Gjinit.
Ndërkohë Hilë Gjini vijon të qëndrojë në spital dhe ndodhet jashtë rrezikut për jetën.
/a.r
