Një incident i rëndë është regjistruar në shkollën “8 Marsi” në Pejë, ku një nxënëse është plagosur me thikë nga një bashkëmoshatar.
Policia ka arrestuar të miturin e dyshuar, i cili po ashtu është nxënës i kësaj shkolle, dhe e ka dërguar në paraburgim për 48 orë.
Zëdhënësi i Policisë së Pejës, Fadil Gashi, tha se ngjarja ka ndodhur rreth orës 08:30, kur stafi i shkollës ka njoftuar policinë për incidentin.
“Policia ka dalë në vendin e ngjarjes, e ka arrestuar të dyshuarin dhe viktima është dërguar në emergjencën e spitalit për trajtim mjekësor. Janë shoqëruar në stacion policor dy dëshmitarë, të cilët janë intervistuar. Është konfiskuar mjeti i mprehtë – thika me të cilën dyshohet se është kryer vepra. Prokurori i Shtetit ka caktuar masën e ndalimit prej 48 orëve për të dyshuarin”, sqaroi Gashi.
Sipas policisë, i mituri akuzohet për shkaktim të “lëndimit të lehtë trupor” dhe “mbajtje në pronësi e kontroll të paautorizuar të armëve.” Ndërkohë, hetimet po vazhdojnë për të sqaruar rrethanat e plota të ngjarjes. / a.m.
