Kryetari i Bashkisë së Lezhës ka folur në një prononcim për mediat mesditën e sotme, lidhur me situatën problematike të krijuar këtë të martë si pasojë e reshjeve intensive të shiut.
Ndreu u shpreh se, megjithëse ka zona të përmbytura, situata ende nuk është alarmante.
“Kjo është një situatë që ne e kemi paralajmëruar publikisht. Është siç e keni parë, gjatë gjithë natës ka patur reshje. Ajo që është më serioze është që ka patur reshje edhe në zonat malore, që karikojnë të gjithë përrenjtë dhe lumenjtë që vijnë nga sipër, plus shkarkimet e hidrocentralit që kanë bërë punën e vet dhe jemi në një situatë problematike. Akoma nuk jemi në një situatë alarmante, sepse nuk ka banesa të identifikuara, por ka zona që kanë toka nën ujë. Janë rreth 450 hektarë gjithsej në territorin e Lezhës (të përmbytura). Të gjitha forcat e bashkisë janë në terren, kudo, duke kontaktuar me banorët. Sepse kryesore është të ndërhyhet sa më shpejt, nëse rrezikohet ndonjë nga banorët.”, tha Ndreu.
Sjellim ndërmend se më herët ditën e sotme, bashkia e Lezhës ka njoftuar qytetarët se si pasojë e reshjeve të shumta dhe shkarkimeve nga hidrocentrali i Vaut të Dejës, situata pritet të rëndohet.
“U kërkojmë të gjithë banorëve që, në rast emergjence apo nëse konstatojnë prezencë uji në banesat e tyre, të kontaktojnë menjëherë në numrin e telefonit: +355 68 367 8727”, thuhej në njoftim.
Bashkia njoftoi se është në gatishmëri dhe po ndjek nga afër situatën për të garantuar ndërhyrje të menjëhershme dhe mbështetje për qytetarët.
Kryebashkiaku shtoi se stafi i emergjencave po fokusohet në se çfarë mund të rikuperohet në terren. Ndreu tha se ka probleme në disa zona të Lezhës, kryesisht në Pllanë, Spiten, Tale 1, Zadrimë.
“Nëse do të vazhdojnë reshjet pritet edhe ndonjë agravim i mundshëm”, shtoi Ndreu.
