COD hap sezonin e dytë të 2018-s, me ekspozitën “Providence” të artistes Ornela Vorpsi. Në ceremoninë e hapjes do të jetë i pranishëm Kryeministri, përfaqësues të institucioneve të kulturës, artit, medias, trupit diplomatik, kabinetit qeveritar, organizatave
ndërkombëtare, shoqërisë civile dhe institucioneve publike.
Ornela Vorpsi prezanton 38 punime në hollin protokollar të Kryeministrisë, sallën “Tako
Artistin” dhe në sallën “Forum”. Ekspozita që gërsheton pikturën, vizatimin, fotografinë dhe
videon është kuruar nga Genti Gjikola. Pjesë e ekspozitës është edhe një instalacion i
veçantë i ndërtuar me librat e saj, botuar në gjuhë të ndryshme.
Ceremonia zyrtare e hapjes mbahet të mërkurën, më 11 prill, ora 18:00 në COD.
Artistja do të jetë në një takim të hapur me mediat dhe dashamirës të artit ditën e enjte, 12 prill nga ora 15:00-18:00 në COD.
Ornela Vorpsi lindi në Tiranë më 1968. Aktualisht jeton dhe punon në Paris. Vorpsi përfundoi studimet në Institutin e Lartë të Arteve (1987 – 1991), në Akademinë e Arteve të Bukura të Breras në Milano (1992 – 1996) dhe më pas në Universitetin Paris VIII, (1997). Ka marrë pjesë në shumë ekspozita në grup, të kuruara nga kuratorë të mirënjohur si Harald Szeemann, Paul Ardenne dhe Walter Keller.
Punët e saj gjenden në koleksione të rëndësishme, përfshirë dhe koleksionin FNAC (Fondacioni Kombëtar i Artit Bashkëkohor në Francë), si dhe në shumë koleksione private. Pasi u vendos në Paris në 1997, Vorpsi iu kushtua edhe letërsisë. Në vitin 2010, Aleksandar Hemon dhe Zadie Smith e cilësuan atë si një nga 35 shkrimtaret më të mira të Europës në “Best European Fiction”. Librat e Vorpsit janë përkthyer në 18 gjuhë.
ma.me
