Ambasada Amerikane ka reaguar pas vendimit të Gjykatës Kushtetuese e cila pezulloi zbatimin e ligjit të “Vettingut” deri në një vendim përfundimtar që do të vijë pas konsultimeve me Komisionin e Venecias.
Në një deklaratë shpërndarë për mediat, ambasada e SHBA deklaron se respekton autoritetin e Gjykatës Kushtetuese dhe vendimin e saj. Nga ana tjetër SHBA dhe BE kërkojnë që referimi në “Venecia” të bëhet sa më shpejtë për të mos penguar reformën në drejtësi. Ja deklarata:
Deklaratë
Shtetet e Bashkuara dhe Bashkimi Europian respektojnë autoritetin e Gjykatës Kushtetuese për të shqyrtuar Ligjin e Vetingut dhe pezulluar zbatimin e tij. Gjykata Kushtetuese ka thënë se do t’ia referojë ligjin Komisionit të Venecias. Nxisim që ky referim të ndodhë sa më shpejt që të jetë e mundur për të parandaluar vonesa. Shtetet e Bashkuara dhe Bashkimi Europian mbeten të përkushtuar ndaj zbatimit të plotë të reformës së gjyqësorit.
/a.m.
