Në vijim të debatit të ndezur sëfundmi në lidhje me rolin e ballistëve dhe të partizanëve në Luftën e Dytë Botërore, zëvendësministri i Mbrojtjes, Petro Koçi ka publikuar në Facebook një qarkore të Mithat Frashërit ku urdhërohen të gjithë çetat e Ballit që të mos luftojnë kundër pushtuesit nazist.
Zëvendësministri i Mbrojtjes dhe kreu i PSV’91, Petro Koçi do të reagonte pas dekorimit nga Presidenti i Republikës Bujar Nishani të 67 anëtarëve të Ballit Kombëtar të vrarë gjatë luftës së dytë botërore.
Koçi cilëson si të papranueshëm dekorimin nga ana e kreut të shtetit të bashkëpunëtorëve të fashizmit, si një thikë pas shpine dhe tradhti ndaj Luftës Antifashiste.
“Dekorimi i bashkëpunëtorëve të fashizmit, thikë pas shpine dhe tradhti ndaj Luftës Antifashiste Nacional-Çlirimtare! President ballist!”, shkruan Koçi në Facebook.
Më tej reagimi i Koçit vijon: “Rreshtimi i Presidentit ne rradhet politike te Ballit Kombetar eshte nje akt antinacionalist. Kjo deshmon qe e djathta nuk po distancohet dot nga ish bashkepunetoret e fashizmit, ndryshe nga e majta qe eshte distancuar qartazi dhe prerazi nga fajet dhe krimet e komunizmit. Te jesh kunder dekorimit te bashkepunetoreve te pushtuesit nuk te ben komunist. Antiballistet nuk jane patjeter komuniste apo bolshevike. Ashtu si antikomunistet nuk jane te gjithe balliste. Presidentin ballist e kemi dhurate nga Sali Berisha”.
Presidenti i Republikës, Bujar Nishani, u ka akorduar titullin “Martir i Demokracisë” 67 ushtarëve të Ballit Kombëtar, të pushkatuar në vitin 1943. Ceremonia u zhvillua më 21 tetor në Divjakë të Lushnjës, në ditën e 73-vjetorit të masakrës.
