Peshkopi i Vatikanit: Emigrantët myslimanë nuk kanë mirëkuptim për vlerat europiane
Të paktën 31 policë janë lënduar në protestat e dhunshme kundër azilkërkuesve, që u zhvilluan të shtunën në mbrëmje, në të cilat rreth 200 militantë, kryesisht të dehur, në Heidenaut kanë hedhur fishekzjarrë dhe shishe molotov drejt policisë. Disa thërrisnin “Heil Hitler”.
Kancelarja Angela Merkel thotë se çështja është një problem më i madh për Europën se kriza e borxhit të Greqisë. Ministri i Brendshëm i Gjermanisë, Thomas de Maiziere, e ka përshkruar situatën si një sfidë të madhe dhe i dënoi sulmet ndaj refugjatëve.
“Në të njëjtën kohë shohim se ka rritje të urrejtjes, fyerjeve dhe dhunë ndaj azilkërkuesve. Kjo është e turpshme dhe e padenjë për vendin tonë”, tha De Maiziere për gazetën “Bild”. Ministri i Drejtësisë, Heiko Maas, tha se ka pasur zero tolerancë për ksenofobinë apo racizmin. Pas natës së dytë me tensione e përplasje mes policisë e anëtarëve të forcave ekstremiste të djathta që sulmuan kampin e refugjatëve në qytetin gjermanolindor të Heidenaut në Saksoni, është njoftuar se situata është përmirësuar dhe se polica ka vendosur një rrip të gjerë sigurie.
Ndërkaq, mbërritja e një mase të madhe refugjatësh nga Lindja e Mesme, shumica e të cilëve janë myslimanë, sipas fjalëve të përfaqësuesit të Vatikanit në Kombet e Bashkuara në Gjenevë të Zvicrës, mund të kthehet në një sfidë për Europën, për identitetin e saj të krishterë dhe demokratik. “Emigrantëve myslimanë u mungon mirëkuptimi për vlerat europiane”, tha peshkopi Silvano Maria Tomasi për transmetuesin e Selisë së Shenjtë, “Radio Vatikani”. “Këtu bëjnë pjesë respekti për një shoqëri pluraliste, ndarja e fesë nga shteti dhe politika, si dhe demokracia. Pranimi i njerëzve në nevojë, sigurisht se është një detyrë kristiane, por Europa ka të drejtë që të ruajë identitetin e vet”, tha Tomasi.
“Myslimanët nuk duhet t’i vënë në dyshim vlerat e lirisë”, tha ai. Po dje, vendin e vizitoi edhe kryebashkiaku i qytetit dhe Kryeministri i landit të Saksonisë, të cilët së bashku theksuan nevojën për forcimin e masave të sigurisë për të penguar dhunën dhe ekseset. Po ashtu, zëvendëskancelari i RFGJ-së, ministër i Ekonomisë dhe njëkohësisht kreu i socialdemokratëve gjermanë, Sigmar Gabriel, mësohet se do ta vizitojë sot strehën e refugjatëve që u sulmua të shtunën nga ekstremistët në qytezën gjermanolindore. Po ashtu, anëtarë të CSU-së gjermane, partneres së Unionit Kristiandemokrat në Bavari, janë shprehur së fundmi për rifutjen e sistemit të kontrolleve kufitare e moszbatimin qoftë edhe të pjesshëm të Marrëveshjes së Shengenit, në mënyrë që të përballojnë më mirë situatën me refugjatët që vërshojnë nga Lindja e Mesme dhe Ballkani.
