Në fund të tetorit të vitit 2012, rreshje të ngjashme me ato që kanë pushtuar aktualisht vendin goditën Shqipërinë.
Nga përmbytjet dhe nga aksidentet rrugore, vetëm në datën 27 tetor humbën jetën pesë persona, ndërsa shtatë të tjerë mbetën të plagosur.
Në Tiranë, sipas raportimit të kohës, uji kishte pushtuar zona të tëra të kryeqytetit, përfshi edhe zonën e Don Boskos, e cila gjendej pothuajse e gjitha gjysmë metri nën ujë.
Megjithatë, situata më problematike regjistrohej në zonën e Maternitetit të Ri, ku lumi i Lanës kishte dalë nga shtrati, duke kërcënuar vetë maternitetin, por mbi të gjitha, duke krijuar një alarm për përhapjen e epidemive për shkak të ujit të ndotur.
Pavarësisht kësaj situate alarmante, Bashkia e Tiranës e kryesuar në atë kohë nga Lulzim Basha u përgjigj me një indiferencë të plotë.
Banorët e zonës thanë për mediat se ndonëse kishin kërkuar në mënyrë të përsëritur ndihmë, nga bashkia u ishte thënë “se situata nuk konsiderohej alarmante dhe nuk do të ndërhyhej”.
Për fat të mirë, pavarësisht neglizhencës së autoriteteve, materniteti shpëtoi nga përmbytja pas qetësimit të rreshjeve atë mbrëmje, ndërkohë që zona përreth u përball me dëme të shumta materiale për shkak të përmbytjes. /Lexo.al
