Pesë organizata joqeveritare janë bastisur nga Policia nën dyshimin se nëpërmjet tyre është financuar terrorizmi dhe janë shpërlarë para në Kosovë.
“Nisa”, “Bregu i Diellit”, “IbniSina”, që veprojnë në Prishtinë, dhe “Kurani” e “EhliBejti” në Prizren, kanë qenë cak i bastisjeve të mërkurën me urdhër të Prokurorisë Speciale, shkruan sot Koha Ditore.
Këto organizata, për të cilat ka raportuar “Koha Ditore”, kanë lidhje me organizata islamike që kanë financuar terrorizmin. Policia ka sekuestruar prova të ndryshme në cilësi të provave materiale.
Gjatë bastisjes janë sekuestruar përkohësisht sende që mund të jenë prova gjatë procedurës penale.
“Aksioni është njëri nga veprimet e ndërmarra në një rast që është duke u hetuar nga Prokuroria Speciale e Republikës së Kosovës, me qëllim të parandalimit dhe luftimit të terrorizmit në Republikën e Kosovës”, ka njoftuar Prokuroria e Shtetit.
Këto organizata janë në mesin e atyre që dyshohen se kanë financuar ekstremizmin fetar islam në Kosovë. Kanë lidhje të forta me imamë xhamish, të cilët muaj më parë janë arrestuar për dyshime të ngjashme.
