Një studim shkencor ka identifikuar pesë faza kryesore të zhvillimit të trurit njerëzor, duke zbuluar se si lidhjet nervore evoluojnë nga lindja deri në moshën 90 vjeç.
Hulumtimi u bazua në skanime truri të 4 mijë personave nga mosha nën një vit deri në 90 vjeç. Shkencëtarët gjetën katër “pika kryesore” rreth moshës 9, 32, 66 dhe 83 vjeç, ku organizimi i trurit ndryshon rrënjësisht.
“Jetët tona kalojnë nëpër faza të ndryshme, dhe tani dimë se edhe truri ynë ndjek një model të ngjashëm”, tha Prof. Duncan Astle nga Universiteti i Cambridge-it.
Fazat e zhvillimit të trurit
Fëmijëria (0–9 vjeç): Lidhjet ndërmjet neuroneve përzgjedhin ato më aktive. Materiali i bardhë dhe ai i gjallë i trurit rritet shpejt, stabilizohen gërshetimet e korteksit dhe trashësia e tij.
Adoleshenca (9–32 vjeç): Efikasiteti i lidhjeve nervore rritet gradualisht, duke përmirësuar funksionet njohëse. Kjo periudhë lidhet shpesh me shfaqjen e problemeve të shëndetit mendor.
Pjekuria (32–66 vjeç): Rreth moshës 32 vjeç, truri stabilizohet. Rajonet e tij bëhen më të ndara dhe lidhjet më efikase. Ngjarjet jetësore si prindërimi mund të ndikojnë në disa ndryshime.
Plakja e hershme (66–83 vjeç): Lidhshmëria nervore fillon të ulet, duke shënuar fazën e parë të plakjes së trurit.
Plakja e vonshme (83+ vjeç): Faza përfundimtare karakterizohet nga humbja graduale e lidhjeve nervore dhe degenerimi i materialit të bardhë të trurit.
Studimi tregon se zhvillimi i trurit nuk është linear, por kalon përmes pikave kyçe kthese. Kjo njohuri mund të ndihmojë shkencëtarët të identifikojnë momentet kur truri është më i prekshëm ndaj çrregullimeve dhe të kuptojnë më mirë faktorët e rrezikut për sëmundjet mendore.
