Donald Trump e ka paralajmëruar Iranin se “nuk do të ekzistojë më” nëse Shtetet e Bashkuara vendosin ta përshkallëzojnë konfliktin.
“Avionët e Shteteve të Bashkuara sapo goditën depo iraniane raketash dhe dronësh, si edhe radarë për shkak të shkeljes së marrëveshjes së armëpushimit… sërish!”, shkruan presidenti amerikan në Truth, duke konfirmuar njoftimin e Komandës Qendrore të SHBA-ve.
“Ka shumë të ngjarë që ata të mos e mësojnë kurrë mësimin! Mund të vijë një moment kur nuk do të jemi më në gjendje të veprojmë me arsye dhe do të detyrohemi ta përfundojmë me mjete ushtarake operacionin që kemi nisur me sukses të madh. Nëse kjo ndodh, Republika Islamike e Iranit do të pushojë së ekzistuari!”, paralajmëroi Trump.
Komanda Qendrore amerikane tha se Marina dhe Forcat Ajrore kanë sulmuar 10 objektiva ushtarake brenda dhe pranë Ngushticës së Hormuzit për t’iu kundërpërgjigjur goditjes me dronë nga Irani kundrejt anijes cisternë “Kiku.”
Kuvajti dhe Bahreini nuk janë kursyer nga raketat e dronët iranianë. Në Kuvajt, objektiv është aeroporti Ali Al Salem, më i rëndësishmi i Emiratit, ku janë të dislokuara forcat amerikane. Në Bahrein, objektiv është baza e Marinës së SHBA-ve, e cila është goditur disa herë që nga fillimi i luftës. Për të dyja sulmet, Irani ka ndërmarrë përsipër përgjegjësinë.
Garda Revolucionare e Iranit ka lëshuar një paralajmërim: bazat amerikane në rajonin e Gjirit do të përjetojnë një “ferr” në ditët në vijim.. Pasdaranët kanë deklaruar se çdo veprim i mëtejshëm do të marrë një “përgjigje të pamëshirshme”.
