SPECIALE JAVANEWS/ Konflikti mes Malajt dhe Gjonit ka nisur rreth 2 vite më parë, kur kryetari i Gjykatës së Apelit ishte duke shqyrtuar një çështje mes shtetasit amerikan Gerhard Haag dhe shqiptarit Agim Selimi, për pavlefshmërinë e një kontrate shitjeje, përmes së cilës ishte tjetërsuar një objekt. I padituri Selimi ka kërkuar përjashtimin e Alaudin Malajt nga shqyrtimi i çështjes dhe, sikurse thuhet në letër, duke qenë i interesuar për zgjidhjen e çështjes në favor të paditësit, shqiptarit Selimi, anëtari i KLD-së, Gjin Gjoni, ka kërkuar në Këshill nisjen e një procedimi ndaj kreut të Apelit. Në letër lihet të nënkuptohet se Gjoni ka qenë i interesuar direkt që Alaudin Malaj të largohej nga shqyrtimi i çështjes dhe për këtë, në mënyrë antiligjore, e ka dërguar letrën deri në Këshill.
Duket se ky moment ka shërbyer për të ndezur konfliktet mes tyre, të cilat janë pasuar me letrën-ankesë që Malaj u ka dërguar.
Malaj
Pasi sqaron pozicionin e tij lidhur me çështjen që po shqyrtonte, Malaj rendit një sërë abuzimesh që Gjin Gjoni ka kryer gjatë ushtrimit të detyrës. Ndër të tjera ai akuzohet se ka manipuluar aksidentin e një 13-vjeçareje, ngjarje e cila me ndihmën e oficerëve të policisë, ia ka faturuar bashkëshortes së Gjonit. Gjithashtu, sipas Malajt, ka liruar nga burgu një të dyshuar për trafik ndërkombëtar droge, duke i ndryshuar masën e sigurisë, nga “arrest me burg”, në atë të “arrestit në shtëpi”. Bëhet fjalë për shtetasin turk Abdulselman Turgut, i cili, nga “arrest me burg” u dërgua me vendim të Apelit në “arrest shtëpie”, çka bëri që ai të arratisej dhe t’i shpëtonte drejtësisë. Në letër thuhet më tej se Gjin Gjoni ka përfituar miliona euro, duke ndërhyrë pranë gjykatësve dhe duke ushtruar presione ndaj tyre.
Gjoni
Anëtari i KLD-së, Gjoni u kundërpërgjigj duke deklaruar se do të bëjë kallëzim penal ndaj kryetarit të Gjykatës së Apelit Tiranë. Ai u shpreh se është i hapur për hetime dhe nëse vërtetohet qoftë dhe një shkelje nga ato që thuhen në letër, është i vendosur të largohet njëherë e përgjithmonë nga sistemi i drejtësisë. Gjyqtari Gjin Gjoni, iu drejtua prokurorisë së Tiranës me një kallëzim penal, ku kërkon fillimin e hetimeve për Malaj, duke e akuzuar këtë të fudit për akuzën e “Shpifjes” të kryer botërisht. Gjin Gjoni në kallëzimin e tij hedh poshtë të gjitha akuzat e rënda që Alaudin Malaj i ka bërë në letrën dëdrguar presidenti të Republikës Nishani dhe anëtarëve të tjerë të Këshillit të Lartë të Drejtësisë. Sipas Gjonit, Malaj ka përdorur një gjuhë fyese ndaj personit të tij, pasi një gjyqtar me 21 vjet karrierë në sitemin e drejtësisë, e ka bërë shitës parfumesh në letrën e tij. Kjo gjuhë, sipas Gjonit shpreh mllefin personal të Kryeatrit të Gjykatës së Apelit Tiranë Alaudin Malaj dhe jo deklarimin objektiv dhe real që ka lidhje me punën dhe veprimtarinë si gjyqtar. Sipas Gjonit, Alaudin Malaj ka ofenduar trupën gjyqësore ku bën pjesë dhe vetë. Gjithashtu në kallëzimin e tij Gjoni ka mohuar akuzat për aksidentimin e fëmijës 13 vjeçar në Laç.
