Në prag të votimit mbi pranimin e Kosovës në Organizatën e Kombeve të Bashkuara, për Arsim, Shkencë dhe Kulturë (UNESCO), është ngritur një stuhi e madhe politike, kurse në Serbi raportohet se po luftohet mes qeverisë dhe opozitës, shkruan Vesti. Në Konferencën e Përgjithshme të UNESCO-s në Paris, ministri i jashtëm rus Sergei Lavrov, ka ngritur zërin duke thënë se politizimi i marrëdhënieve kulturore është i papranueshëm, derisa ndihmës sekretari amerikan i shtetit, Anthony Blinken, ka thënë se njohja e pavarësisë së Kosovës është e ndarë nga kandidimi në UNESCO, transmeton lajmi.net.
“Disa kolegë janë duke u përpjekur të imponojnë këtë pyetje duke shkelur kështu rëndë rezolutën 1244. Kjo është një procedurë e rrezikshme”, ka deklaruar Lavrov, kurse Blinken i është kundërpërgjigjur duke thënë se pa dyshim që ekziston një mënyrë që Kosova të pranohet në këtë organizatë, dhe e cila nuk do t bllokohet nga rezoluta 1244.
“Kjo nuk është një çështje e njohjes apo mosnjohjes. Vendet që nuk e njohin Kosovën apo agjencitë e specializuar si: Banka Botërore dhe Fondi Monetar Ndërkombëtar mbështesin kandidaturën e Kosovës”, ka deklaruar Blinken duke mbrojtur ‘luftën’ e Kosovës për pranim në UNESCO. Luftë të ashpër pret edhe ministri i drejtësisë të Serbisë, Nikolla Selakoviç, i cili është i bindur se shteti i Serbisë do të luftojë deri në momentin e fundit.
Ai thotë se bëhet fjalë për popullin serb, trashëgiminë kulturore-historike, periudhë kjo më e vlefshmja dhe më e ndritshmja e Serbisë në Kosovë që nga mesjeta.
Me përjashtim të disa shoqatave sportive, siç ka deklaruar zyrtari i opozitës nga Partia Demokratike e Serbisë, Vladimir Todoriç, Kosova është pranuar edhe në disa organizata të rëndësishme. Ai i ka pyetur kryeministrin e Serbisë, Aleksandar Vuçiç dhe ministrin e jashtëm Ivica Daçiç, se pse ata nuk ishin angazhuar më herët për të parandaluar pranimin e Kosovës në UNESCO.
“Ku ishin ata kur Kosova nënshkroi marrëveshjen e Stabilizim Asociimit, kur mori kodin telefonik ndërkombëtar 383, dhe kur u pranua në Komitetin Olimpik Ndërkombëtar? A e kishte ngritur zërin Daçiç kundër pranimit të Kosovës në FIBA, dhe ku ishte Vuçiç kur Kosova u pranua në Bankën Evropianë për Rindërtim dhe Zhvillim, Bankën Botërore dhe FMN”,- ka pyetur ndër tjera Todoriç.
