Institucioni i Presidentit bën të ditur se sot do të zhvillojë shortin për zgjedhjen e përbërjes së re të Këshillit të Emërimeve në Drejtësi.
Pikërisht institucioni që është bërë mollë sherri muajt e fundit, për listimin e kandidatëve për anëtarë të Gjykatës Kushtetuese.
“Sot në ora 12:00 në Institucionin e Presidentit të Republikës hidhet shorti për zgjedhjen e anëtarëve të Këshillit të ri të Emërimeve në Drejtësi (KED).
Transmetim LIVE – TRANSPARENCË E PLOTË”, bën të ditur zëdhënësi i Presidentit, Tedi Blushi.
Në total KED-ja përbëhet nga një trupë prej 7 anëtarësh, ndërkohë që për këtë organ të rëndësishëm të sistemit të drejtësisë zgjidhen edhe 3 anëtarë zëvendësues.
KED ka si funksion që të bëj vlerësimin e kandidatëve për anëtar të Gjykatës Kushtetuese, anëtarëve të Gjykatës së Lartë, Prokurorëve etj.
Si rrallë më parë, Presidenti i Republikës është përplasur kësaj here më kreun e KED-së, Ardian Dvorani, të cilin e akuzon për shpërdorim detyre dhe ndaj të cilit ka bërë një padi penale në Prokurori, shkruan panorama.
Zanafilla e sherrit nisi pikërisht për mënyrën se si kreu i KED sipas Presidencës zbatoi ligjin dhe i dërgoi kreut të shtetit dy lista për zgjedhjen e anëtarëve të rinj të Kushtetueses në të njëjtën ditë, duke i hequr të drejtën të zbatojë afatet ligjore.
Çfarë thotë ligji për ngritjen e KED-së? Pika 3 e nenit 149/d të Kushtetutës së ndryshuar në vitin 2016, parashikon që Presidenti i përzgjedh me short anëtarët e Këshilli të Emërimeve në Drejtësi, midis datave 1 dhe 5 dhjetor të çdo viti kalendarik, dy gjyqtarë nga Gjykata Kushtetuese, një gjyqtar nga Gjykata e Lartë (që edhe e drejton këtë institucion), një prokuror nga Prokuroria e Përgjithshme, dy gjyqtarë, dy prokurorë nga gjykatat e apelit, si dhe një gjyqtar nga gjykatat administrative. Por nëse Presidenti i Republikës nuk arrin të zgjedhë anëtarët deri në datën 5 dhjetor, Kryetari i Kuvendit i zgjedh ata me short brenda datës 10 dhjetor, por kreu i shtetit ka konfirmuar se do ta hedhë vetë shortin.
Por KED-ja mund të futet në ngërç nëse nis hetimi kundër Ardian Dvoranit pas kallëzimit të Metës kundër tij. Ligji e përcakton se nëse një person që është në ndjekje penale nga organi i akuzës nuk mund të kandidojë për të qenë pjesë e KED-së. Kjo do të thotë se Ardian Dvorani, që drejton Këshillin e Emërimeve në Drejtësi për shkak të funksionit që ka si anëtar i Gjykatës së Lartë, i ngelur vetëm pas procesit të vettingut rrezikon që të përjashtohet nga rikandidimi nëse ndaj tij do të nisë një proces penal nga prokuroria, shkruan shqiptarja.com.
E gjithë kjo situatë do të thotë se nëse nis hetimi kundër Dvoranit pas kallëzimit të Ilir Metës ai mbetet jashtë KED-së dhe në kushtet kur nga Gjykata e Lartë nuk ka asnjë emër tjetër (pasi Medi Bici është anëtar i KLGj-së) ky institucion futet në ngërç. Prokuroria e Tiranës pasi regjistroi kallëzimin e Presidentit deklaroi se po bën verifikime. Ndërsa ligji e përcakton se anëtari përjashtohet vetëm nëse nisin hetimet kundër tij, por mbetet për t’u parë se si do të veprojë Meta sot.
g.kosovari
