Pas gati 3 ditësh ndërhyrje nga toka dhe ajri, zjarri në fshatrat Riban dhe Ngraçan të Mallakastrës po shkon drejt izolimit.
Autoritetet njoftuan mbrëmjen e së enjtes se tashmë beteja vazhdon në masivin pyjor të Drenijes, ku terreni ka vështirësuar ndërhyrjen për shkak të errësirës.
Vatra po mbahet gjithsesi nën kontroll, ndërsa banorët e evakuuar janë rikthyer në banesat e tyre.
Sipas të dhënave të Ministrisë së Mbrojtjes, gjatë 12 orëve të fundit janë raportuar 25 vatra zjarri në vend, nga të cilat 10 mbeten aktive.
Aksioni po vijon në fshatin Priskë në malin e Dajtit nga toka dhe ajri, por bëhet e ditur se nuk ka rrezik për zonat e banuara. Vatra aktive ka edhe në qarqet e Elbasanit, por larg zonave të banuara.
Ndrësa në Kostren të Beratit, është riaktivizuar vatra e zjarrit dhe forcat zjarrfikëse po punojnë për shuarjen e saj.
Në aksionet për shuarjen e zjarreve janë angazhuar 454 forca operacionale dhe 47 automjete zjarrfikëse. Në mbështetje janë angazhuar gjithashtu 110 efektivë të Forcave të Armatosura, 3 helikopterë, avioni “Air Tractor” dhe 3 automjete zjarrfikëse të Forcave të Armatosura.
Sipas të dhënave të agjencisë Europiane të Mbrojtjes ndaj Zjarreve, raportohet se deri me tani në vendin tonë janë djegur 1636 hektarë pyje.
