Është përmirësuar situata nga përmbytjet në Fier, teksa bëhet me dije se nuk ka infrastrukturë kritike të dëmtuar, akset nacionale dhe rurale janë të kalueshme, ndërsa edhe furnizimi me energji elektrike dhe ujë është rikthyer në normalitet.
Prurjet në lumin Vjosë janë në kuota normale me një tendencë në ulje, ndërsa në Seman, prurjet janë në kuota të larta përgjatë gjithë argjinaturës nga territori i Bashkisë Lushnjë, Roskovec, Patos, Fier e deri në grykëderdhje.
Ndërkohë, Semani është tërhequr nga banesat dhe rrugët e fshatit Murriz Njësia Administrative Fiershegan, Bashkia Lushnjë.
Vijojnë të jenë të përmbytura 100 ha toke bujqësore brenda argjinaturave ne Lushnje, Roskovec-Patos dhe Fier.
Në fshatin Mbrostar, bashkia Fier, lumi Seman ka përmbytur disa kasolle bagëtish dhe depozita bari, të cilat ndodhen brenda argjinaturës. Në fshatin Petov, ka prezencë uji në një oborrin e një banese.
Përgjatë lumit Seman, rreziku nuk është larguar ende nga zonat e banuara në fshatrat Belinë, Kallm, Mbrostar, Mujalli, Gercalli dhe Petov.
Ndërkohë, lumi Shkumbin është tërhequr brenda shtratit të tij.
