Një ditë pas përmbytjeve të shumta në qytetin e Durrësit dhe zonat rurale, bashkia e Durrësit ka nxjerrë në terren grupet për verifikimin e dëmeve.
13 grupe me specialistë do të shkojnë në çdo shtëpi, ku ka depërtuar uji, për të bërë sa më shpejt vlerësimin e dëmeve dhe më pas dëmshpërblimin e të gjithë qytetarëve të dëmtuar.
Qytetarët shprehen se kanë shumë dëmtime nga përmbytja, por vlerësojnë edhe faktin që dëmet e tyre po verifikohen nga bashkia.
“Jemi të kënaqur shumë. Nuk ka bërë vaki këto 28 vite që kemi këtë. / Është hera e parë që kanali u mbush dhe erdhi uji për 15 minuta. Asnjëherë nuk kanë ardhur. Shyqyr që erdhën këtë vit,” thonë dy banorë të zonës.
Nuk është bërë ende me dije se sa do të zgjasë procesi i verifikimit të dëmeve dhe nëse do të shtrihet në të gjitha zonat e përmbytura, por grupet e verifikimit që kanë nisur punën dhe dhe sot kanë qenë kryesisht në zonën e ish-Kënetës.
