Një përleshje me thika mes shqiptarëve ka ndodhur mbrëmjen e djeshme (21 mars) në mes të Selanikut në Greqi, me pasojë plagosjen e rëndë të 2 prej tyre.
Policia e vendit fqinj informoi se një prej tyre është në gjendje kritike për jetën. Hetuesit kanë siguruar edhe pamjet e kamerave të sigurisë për dinamikën e përleshjes, ku në një moment dallohet një prej shqiptarëve teksa bie në asfalt pas goditjes me thikë.
Emrat e tyre nuk u publikuan nga policia, teksa po trajtohen të dy në spital. Ngjarja ndodhi në Evosmos, rreth orës 19:00, në perëndim të Selanikut dhe të plagosurit janë të moshës 33 dhe 26 vjeç, teksa trajtohen në spitalin AHEPA.
Efektivë të policisë së Departamentit të Parandalimit dhe Shuarjes së Krimit kanë nxituar për të përcaktuar se çfarë ka ndodhur. Kur kanë mbërritur në zonë kanë gjetur dy persona me plagë me thikë dhe ekipet e shpëtimit të EKAB-it, të cilët i kanë transportuar në spital. Dy personat duket se kanë goditur me thikë njëri-tjetrin në mes të rrugës, në rrugën ‘Papagou’, për arsye ende të panjohura.
Pas ngjarjes, njëri prej burrave është larguar nga vendi i ngjarjes dhe pak më vonë ka shkuar për të kërkuar ndihmë në një dyqan aty pranë.
Videot e mëposhtme kapin momentin kur njëri nga dy personat e përfshirë mbërrin i plagosur me makinën e tij jashtë një supermarketi të lagjes, ndalon në mes të rrugës dhe shembet pas pak, informon media greke.
Sipas informacioneve, personi në fjalë ka pesë plagë me thikë në shpinë dhe ndodhet në gjendje kritike për jetën.
