Prokuroria e Përgjithshme ka dërguar për ekspertim aparatet celularë të 6 të dyshuarve për përplasjen me armë në Laç, mes tyre edhe telefonat e deputetit Armando Prenga.
Procedura
Sipas prokurorisë, kjo procedurë do të provojë komunikimin mes anëtarëve të fisit Çali, Gjergjit, Gjokës, Tomës, Nikollës dhe Françeskut, këta të fundit vëllezër, si dhe telefonatat në sallën operative nëse ekzistojnë, me shefin e Komisariatit dhe ministrin Saimir Tahiri sipas pretendimeve të Gjergj dhe Gjok Çalit. Gjithashtu do verifikohen edhe të gjitha SMS-të telefonike mes tyre. Nga këqyrja e tyre, hetuesit thanë se do të provohet alibia e pjesëtarëve të familjes Çali, që akuzuan deputetin për kërcënimin në lokalin e tyre, si dhe policinë për mosndërhyrje. Po kështu verifikimi i mesazheve dhe telefonatave të telefonit të deputetit Prenga do të provojë nëse ai ka komunikuar me vëllanë e tij apo ndonjë drejtues policie për përplasjen me familjen Çali në rrugën Patok-Laç mbrëmjen e 4 shtatorit. Nëse ka kërkuar ndihmë dhe denoncuar faktin se i kishin zënë pritë në rrugë me armë.
Një tjetër element i rëndësishëm është zbardhja nëpërmjet IMEI-t dhe qelizave telefonike të vendndodhjes së të dyshuarve në momentet para, gjatë dhe pas përleshjes me armë. Në këtë mënyrë do zbardhet itinerari i lëvizjeve të anëtarëve të fisit Çali, deputetit Prenga, vëllait të tij të plagosur Eduart Prenga dhe dy shoqëruesve. Nëpërmjet tyre do zbulohet se si palët kanë arritur te përleshja para Komisariatit, nëse ka ndodhur brenda apo jashtë ambienteve. Do zbulohet edhe fakti se cila nga palët ka sulmuar e para nëpërmjet lëvizjes me qelizat telefonike. Priten edhe rezultatet e vendndodhjes së shoqëruesit të deputetit Prenga, Anton leka, i cili ka thënë se ndodhej në një dasmë në Kamzë mbrëmjen e ngjarjes.
Për përleshjen nuk disponohen pamje filmike, pasi as ato të komisariatit apo të bizneseve përreth nuk kanë punuar dhe nuk disponohen filmime. Anëtarët e fisit Çali pretendojnë se Prenga i ka qëlluar brenda komisariatit të Kurbinit dhe policia ka qëndruar pasive. Sipas tyre, policët panë deputetin me armë, por nuk reaguan. Por ndryshe kanë dëshmuar policët e pyetur në shërbim, duke thënë se për shkak të errësirës, mungesës së ndriçimit dhe tensionit të krijuar, nuk panë që deputeti apo persona të tjerë të kishin armë zjarri në dorë.
