Procedimi për dosjen “Metamorfoza” ka nisur nga Prokuroria e Posaçme, në 16 Janar të këtij viti. Në SPAK, pronarët e 39 hektarë tokë në fshatin Pulaj në Velipojë kanë depozituar një kallëzim, për falsifikim dokumentesh, pastrim parash dhe grup i strukturuar kriminal. Ata pretendojnë se prona e tyre është tjetërsuar nga Pëllumb Gjoka në bashkëpunim me disa persona të tjerë.
Kjo çështje është hetuar më herët edhe nga ana e prokurorisë së Shkodrës. Procedimi ishte regjistruar në 24 Qershor të 2020. Çështja për tjetërsimin e 39 hektarëve tokë është hetuar nga prokurori Xhevahir Lita. Ne dosjen e SPAK janë të zbardhura edhe komunikimet mes tyre dhe se si prokurori Lita pushoi çështje.
Në datën 12 Nëntor të 2020 ata diskutojnë mes tyre për tërheqjen e disa shkresave nga arkivi dhe prokurori Lita i konfirmon se e ka në vëmendje. Xhevahir Lita i dërgon disa mesazhe Gjokës për t’i konfirmuar se nuk e ka harruar çështjen e tij.
Xhevahir Lita: Dje e kam bisedu me atë që të bëjmë atë shkresën, e pashë që e kishte pak më vështirësi, po nëse nuk e bën dhe nesër do ia marr ta bëj vet. Për atë letër po merrem, se atij tjetrit i ka thënë edhe një tjetër dhe bën pak kakërdhija por do e zgjidh pa merak.
Biznesmeni Pëllumb Gjoka dhe prokurori Xhevahir Lita komunikojnë sërish së bashku në 24 Shkurt të 2021. Biznesmeni kërkon që të mbyllet çështja për tjetërsimin e 39 hektarëve tokë.
Xhevahir Lita: Shih se ndoshta ka bërë, një vendim përkryerje e ekspertimit e procedurës. Takova dhe Valbonën dhe më tha se ka marrë mostra për t’i dërguar për ekspertim. Unë jam e bindur por më tha thuaj Pllumit të kapë dikë që të dalë tamam. Po edhe këtij akt ekspertimit bjeri mbrapa që ta qepet mirë si dosje ai kolegu im.
Pëllumb Gjoka: Ti kërkoja nesër për ta mbyll. Se edhe një kafe të duhet ty. Se të kam ba telefon 300 herë. Mik me ke edhe të kam, por çdo gja ka lezetin e vet. Më shkon mua se kafja është bereqet. Kshu që kujtoju nesër t’i japësh drejtim.
Xhevahir Lita: Të bëjmë dhe këtë ekspertim të dalë se ka firmose vetë Dranja te prokura dhe pastaj të hajë një m… ai kolegu im.
Prokurori Xhevahir Lita kishte vendosur në vitin 2019 mosfillimin e procedimit penal për çështjen e tjetërsimit të pronave, thuhet në dosjen e SPAK. Kjo çështje është rihapur sërish në vitin 2020 nga një tjetër prokurore, pasi i ka mbërritur një kallëzim i dytë. Dosja është pushuar me vendim të Gjykatës së Shkodrës në 14 Nëntor të vitit 2022.
Në vendimin e Gjykatës së Posaçme thuhet se prokurori Xhevahir Lita është i njëanshëm, kur bëhet fjalë për çështje që lidhjen me Behar Bajrin, Pëllumb Gjokën, Bardhyl Mavraj dhe të afërm të tyre.
“Duke pasur parasysh edhe veprimet e tij, në rastin e lirimit të Behar Brajoviq ku bashkëvepron me Pellumb Gjokën. Në rastin kur prokurori Lita ndërhyn për një procedim penal në emër të personit G.Vaso gjen një zgjidhje për procedimin sipas kërkesës së Behar Brajoviq. Xhevahir Lita kontaktohet nga Bardhyl Mavraj në lidhje me shmangien nga përgjegjësia penale të Eljon Hato dhe Arsad Bashli, gatishmëria për t’i ndihmuar dhe liria në komunikim me to, krijon dyshime të arsyeshme se Lita bashkëpunon me shtetasit e lartpërmendur jo thjesht si lidhje shoqërore, por në formën e një grupi të strukturuar kriminal.”
Në komunikimet përmes aplikacionit SKY, ish-prokurori Xhevahir Lita shfaqet gjithashtu duke folur me biznesmenin Pëllumb Gjoka dhe Behar Bajrin për lirimin nga burgu të këtij të fundit. Bajri i thotë biznesmenit se do ishte mirë që çështja e tij të merrej nga Lita. Pasi dosja vendoset që do të ndiqet nga prokurori Lita, Bajri flet sërish me biznesmenin Gjoka, ku e pyet se sa lekë do prokurori për ta liruar.
