Policia greke, me urdhër të prokurorisë, ka bërë publikë emrat dhe fotografitë e 145 personave të akuzuar si pjesëtarë të bandës famëkeqe të shqiptarit “Genti”, i cili kontrollonte 35% të shpërndarjes së drogës në qendër të Athinës. Për policinë greke, 144 persona janë të identifikuar, i 145-ti është një shqiptar të cilit i dihet vetëm pseudonimi “Tiku”, dhe i fundit është misteriozi “Genti”, që ndodhet në Shqipëri dhe dyshohet se nuk ka hyrë asnjëherë në Greqi. Nga 146 anëtarët, mes të cilëve edhe femra, disa janë arrestuar në operacionin e 26 nëntorit të koduar “Kimera”, disa ndodhen prej kohësh në burg, ndërsa shumë të tjerë janë shpallur persona në kërkim.
Mes të akuzuarve janë edhe dy shtetas të njohur për drejtësinë shqiptare, njëri nga Saranda e tjetri nga Vlora. Sipas mediave greke, Viktor Ajasllari etikohet si vrasës, dhe madje media zbardh edhe një bisedë të tij me “Gentin” ku flitet për blerjen e një arme për një vrasje që do të kryhej, por që nuk u realizua pasi policia greke finalizoi operacionin “Kimera”.
Viktori: Hë mo vogëlush.
Genti: Ç’bën?
Viktori: Mirë, ti?
Genti: Ka një shoku im një nga ato që bën “piu”, por ka dhe nga ato me rreth.
Viktori: Ç’është ajo?
Genti: Hekur.
Viktori: Eee.
Genti: Ka hekur me rreth.
Viktori: Nga ato të vjetrat.
Genti: Me atë rrethoren që nuk lë gjurmë.
Një tjetër bisedë me një person të panjohur për blerjen e një arme.
I panjohuri: Une shkova dhe mora atë porosinë vella.
Genti: Shiko, shiko mos e shoh dhe e marr për vete se më duhet.
I panjohuri: Unë të them sot për nesër vëlla, sepse i kam njoftuar të gjithë, sepse jam pa lekë, më kupton.
Genti: Prit të marr në tel unë, mbase sot nesër, mbase gjej para o burrë ta marr unë.
I panjohuri: Prandaj je vëlla
Genti: Kjo është vegël, nuk lë gjurmë.
Banda akuzohet edhe për vrasjen e 32-vjeçarit Rigert Dervishi në lagjen “Keratsini”, në një atentat ku objektiv ishte 36-vjeçari të cilit i zbulohen edhe inicialet Th.V., të cilit më parë i ishte vendosur edhe bombë me telekomandë.
Sarandjoti dhe vlonjati i kërkuar, pjesë e bandës së “Gentit”
Pas publikimit të fotove dhe emrave të të akuzuarve, janë identifikuar mes tyre dhe persona të njohur për drejtësinë shqiptare. I pari është Spiro Vasil Nika, 47 vjeç, i cili në të vërtetë është Abaz Halit Taqe, banues në fshatin Cukë të Sarandës. Abaz Taqe, është dënuar nga Gjykata e Lartë me 15 vjet burg, për veprën penale “Rrëmbim personi” në 23.05.2002.
Me të njëjtin vendim u dënuan edhe dy persona të tjerë bashkëpunëtorë në veprën penale të rrëmbimit, edhe këta banorë të Konispolit, Flamur Rako, me 25 vjet burg e Haxhi Idrizi me 18 vite burg. Ngjarja e bujshme për të cilën akuzohen tre personat, mes tyre edhe Abaz Taqe, ka ndodhur në 27 qershor 1997 në fshatin Vrinë, rreth 1 km larg qytetit antik të Butrintit dhe rreth 20 km larg qytetit të Sarandës. Flamur Rako, Haxhi Idrizi, Abaz Taqe e Elton Korça, që të katërt banorë të Konispolit, akuzohen se kanë rrëmbyer 17-vjeçaren D. Dh. në një ngjarje ku Rako akuzohet se ka vrarë me armë zjarri edhe babanë e 17-vjeçares, J. Dhimitri. 17-vjeçarja është mbajtur atëherë për disa ditë nga rrëmbyesit e fshehur në Syrin e Kaltër, ndërkohë që është liruar pak ditë pas ngjarjes, te hotel “Gjika” në qytetin e Sarandës, ku në përpjekje për lirimin e 17-vjeçares pati edhe një shkëmbim zjarri, gjatë të cilit mbeti i vrarë njëri prej rrëmbyesve, pikërisht Elton Korça. Edhe sot ka ngelur mister vrasja e Elton Korçës, pasi askush nuk u identifikua si autor i vrasjes.
Abaz Taqes iu shua dënimi më 18.07.2012 nga Gjykata e Sarandës, pasi për 10 vjet nuk u arrit të kapej nga policia. Mes të arrestuarve është edhe Martin allias Ani Brakaj, nga Vlora. Brakaj është person i kërkuar në Shqipëri, i dënuar me 10 vjet burg, pasi ka tentuar të trafikojë 21 kg marijuanë drejt Greqisë në vitin 2012. Droga iu kap dy të rinjve në një hotel në Sarandë, ndërkohë që Brakaj ishte përgjuar teksa kontrollonte trafikun nga burgu i Koridhalos në Greqi.
BW/d.i.
