A është e përgatitur sot Shqipëria për të përballuar një emergjencë të re shëndetësore?
Të gjitha vendet anëtare të Organizatës Botërore të Shëndetësisë (OBSH) janë të shqetësuara për mungesat që shfaqen gjatë përballimit të pandemisë, por të qenët i përgatitur për një kërcenim të ri shëndetësor është domosdoshmëri.
OBSH-ja thekson se të gjitha vendet anëtare duhet të zbatojnë rregulloren e re ndërkombëtare të shëndetit në kuadër të emergjencave dhe vendi ynë është i dyti në rajon që po e ndërmerr këtë hap për t’u pajisur me instrumentet e duhura.
“Realisht çdo vend, përfshirë Shqipëria, kemi aftësinë e duhur për t’iu përgjigjur emergjencave që priten në të ardhmen. Vendi ka kaluar mes zjarrit të tërmetit, mes zjarrit të pandemisë dhe emergjencave të tjera. Sigurisht nga këto vështirësi forcohesh. Është e rëndësishme që ato të evidentohen në mënyrë skematike, të shikohen në hollësi dhe të vlerësohet çfarë mund të bëhet më shumë dhe më mirë,” u shpreh Gazmend Bejtja, përfaqësues i zyrës së OBSH-së në Tiranë.
Drejtoresha e Institutit të Shëndetit Publik (ISHP), Eugena Tomini, tha se çdo institucion ka përgjegjësinë për të identifikuar nevojat që ka sistemi ynë shëndetësor në përgjigje të situatave emergjente të shëndetit publik, ndaj për këtë duhet dokumentim dhe përgatitje serioze.
“Detektimi, vlerësimi, parapërgatitja, parandalimi dhe reagimi në kohë sigurisht në kuadër të gjithë bashkëveprimit dhe veprimeve që ne kryejmë në të gjitha institucionet, është një arritje e dytë që Shqipëria po kryen mbas vitit 2016 në vlerësimin e jashtëm të përbashkët me ekspertët ndërkombëtarë,” deklaroi znj. Tomini.
Rezultatet e vlerësimit do të shërbejnë për përgatitjen e Planit Kombëtar të Veprimit për Sigurinë Shëndetësore, duke mundësuar angazhimin e donatorëve aktualë dhe potencialë për zbatimin e tij
