Update/ Ekspertët e reformës në drejtësi kanë përfunduar mbledhjen pas disa orësh të gjata, duke thënë se ditën e hënë, ata do ta kenë gati draftin, për t’ia çuar atë Komisionit të Posaçëm për reformën.
Ekspertët thanë se opozita është e mirëpritur, pavarësisht se ekspertët demokratë janë larguar dhe nuk pranojnë të diskutojnë me ta. Kërkesa e opozitës është që formati i votimit të disa zyrtarëve të lartë në gjyqësor të bëhet me një shumicë kushtetuese në parlament (2/3, 93 vota), ndërsa mazhoranca i qëndron formulës së votimit të cilësuar (3/5, 84 vota).
“Ata sot janë larguar pasi nuk pranojnë të diskutojnë më me ne…. ne shpresojmë që nesër ta mbyllim draftin, të gjitha nenet pa përjashtim…Ne do të shkojmë me draftin që e kanë përgatitur ekpertët e nivelit të lartë… ne kemi gati draftin dhe mirëpresim të gjitha vërejtjet e tyre… janë shumë pak çështje që na ndajnë, për shumicën e gjerave jemi dakort…. Ne jemi në dijeni se reporterët e komisionit të Venecias do të jenë të pranishëm rreth datës 20 janar… kështu ne duhet ta përfundojmë draftin e cili do duhet konsultuar nga Komisioni i Posaçëm.” tha eksperti Sokol Sadushi
*……*
Pas një pushimi të shkurtër, mbledhja e ekspertëve të drejtësisë është braktisur nga ana e anëtarëve të opozitës. Mesa duket ngërçi në lidhje me formulën e votimit të Këshillit të Lartë Gjyqësor (ajo që sot quhet KLD) ka bërë që ekspertët e opozitës të braktisin mbledhjen, e cila do duhet të draftojë ndryshimet, të cilat do duhet të jenë gati për më 12 janar, për t’i kaluar komisionit ad hoc për reformën në drejtësi.
Mbledhja e kësaj të diele është shoqëruar me debate mes palëve, pasi opozita dhe mazhoranca nuk dakortësohen në lidhje me formulën e votimit të instancave më të larta të gjyqësorit, që do të materializojnë reformën më të rëndësishmë të këtyre dekadave.
Mazhoranca i ka qëndruar formatit të votimi me shumicë të cilësuar, pra me 3/5, të isntancave si Këshilli i Lartë i Drejtësisë, i cili më pas do të quhet Këshilli i Lartë i Gjyqësorit. Por opozita është kundër kësaj formule dhe kërkon një shumicë kushtetuese, pra me 2/3 të votave, për anëtarët e KLGJ-së dhe atyre të Gjykatës Kushtetuese.
Konsensusi mes palëve kështu u prish brenda pak ditësh, teksa vetëm para dy ditësh, ndërmjetësimi mes ekspertëve të opozitës dhe atyre të mazhorancës erdhi falë ndërhyrjes së ambasadorit të SHBA-së Donald Lu dhe ambsadores së BE Romana Vlahutin.
Reagimi i PD-së pas bojkotit te mbledhjes se eksperteve
Pasi braktisën mbledhjen për reformën, përmes një deklarate, ekspertëtë e PD thonë se edhe pse ditën e djeshme u ra dakort parimisht për të reflektuar mbi rekomandimin nr 55 të Komisionit të Venecias, ekspertët e mazhorancës refuzuan një gjë të tillë. Kjo ka bërë, shkruhet në deklaratë, që ekspertët e PD-së ta shihnin të pamundur vijimin e diskutimeve.
“Pika e parë e diskutimit ishte reflektimi i rekomandimit të Komisionit të Venecias mbi nevojën e eleminimit të kapjes politike të sistemit të drejtesisë, sipas një propozimi konkret kompromisi të ofruar në përputhje me të nga ekspertët e Partisë Demokratike. Edhe pse dje në mbrëmje u ra dakord parimisht për të reflektuar rekomandimin nr. 55 të Komisionit të Venecias dhe që propozimi i ekspertëve të Partisë Demokratike do të shqyrtohej me kujdes, sot që në fillim të mbledhjes, pa asnjë argument, ekspertët e caktuar nga mazhoranca refuzuan ta analizonin këtë propozim, duke treguar vendosmërinë e tyre për të mos marrë në vlerësim asnjë alternativë që siguron moskapjen politike të sistemit të drejtesisë, pavaresisht qendrimit të prerë të mbajtur nga Komisioni i Venecias mbi këtë çështje.
Duke parë vendosmërinë e ekspertëve të mazhorancës për të mosreflektuar rekomandimet e Komisionit të Venecias, si dhe mos vlerësimin e mundësive për zgjidhje të mundshme kompromisi dhe të përbashkëta, ekspertët e Partisë Demokratike u ndodhen në pamundësi për të vijuar diskutimet në një mbledhje të përbashkët, që nuk ofron asnjë mundësi për zgjidhje të përbashkëta.”- shkruhet në deklaratën e PD.
