Gjirokastra ka qenë stacioni i radhës i Kadastrës Shqiptare në procesin e regjistrimit për herë të parë të pronave. Drejtori i Përgjithshëm i Kadastrës, Artan Lame ishte në Gjirokastër për të lëshuar certifikatat e para të pronësisë për lagjet 18 shtatori, lagjet e reja të qytetit, zona e Gërhotit dhe përtej përfshirë edhe zonën e burimeve të Viroit.
Gjirokastra bën pjesë në ato qytete në të cilat nuk kishte përfunduar asnjëherë regjistrimi fillestar i pronave që prej viteve të Pavarësisë. Për më tepër, ky proces nuk ishte kryer fare as në lagjet e reja të qytetit të ndërtuara gjatë dhjetëvjeçarëve të periudhës socialiste.
Një projekt për këtë qëllim, i nisur me Bankën Botërore shumë vite më parë, ishte lënë në mes për t’u vijuar vetëm vitet e fundit.
Qytete si Gjirokastra, vështirësive të zakonshme të procesit të regjistrimit, i shtojnë edhe vështirësi të tjera që janë unike. Kjo ndodh sepse kemi të bëjmë me qytete mesjetare, ku ndërtimet janë të ngatërruara e të pleksura me njëri-tjetrin, si edhe faktin tjetër që në qytete të tilla çështjet e trashëgimisë e të ndarjes së pasurive, midis anëtarëve të së njëtës familje janë një problem më vete.
“Qytetet mesjetare janë makth në procesin e regjistrimit, por edhe një shërbim i domosdoshëm për shpëtimin e tyre”, u shpreh Lame. Kjo, sepse pa kryer këtë proces është gati e pamundur që ato të kenë mundësi të përfitojnë nga programet e rimëkëmbjes, të restaurimit, të kredimarrjes, të rijetëzimit e kështu me radhë.
Të njëjtat problematika komplekse janë ndeshur vitet e fundit në regjistrimin fillestar në lagjen Kala në Elbasan, në Himarë, në Berat, etj.
Zona e fundit kadastrale që tashmë përfundoi regjistrimin fillestar, zona 8541, përmban 10.100 pasuri private dhe publike, të cilat e çojnë në mbi 20 mijë numrin e pasurive të regjistruara të tre zonave të qytetit.
/a.r
