Për herë të parë që nga muaji Mars, Partia Demokratike mblodhi Këshillin Kombëtar. Në agjendën e saj sot, 17 dhjetor ishte parashikuar situata politike dhe organizimi i protestës së 22 dhjetorit. Kjo e fundit mori vëmendjen kryesore të diskutimeve duke shtyrë për një mbledhje tjetër diskutimet për çështjet e ndryshme, edhe për analizën brenda partisë.
Siç raportoi gazetari Enkel Xhangoli, gjatë diskutimeve me dyer të mbyllura ka pasur disa propozime. Në fund u vendos që ndryshe nga herët e tjera të ngrihen disa grupe pune që do të merren me mobilizimin e strukturave dhe qytetarëve për protestën e së hënës. Puna e tyre do të monitorohet vazhdimisht nga partia, kjo edhe për faktin, siç raportoi Xhangoli, se ka pasur akuza në të shkuarën që nuk është punuar sa duhet.
“Noka është shprehur që për të patur një lloj miratimi nga anëtarët, grupet e punës duhet të punojnë në terren dhe do monitorohen nga anëtarët e Këshillit Kombëtar”, raportoi gazetari.
Gjithsesi deri në këto momente nuk ka pasur një udhëzues konkret apo platformë për protestat nëse do vijojnë apo do ketë vetëm një protestë kombëtare
Berisha u la porosi që të punojnë dhe të koordinohen me strukturat në të gjithë vendin që të kenë protestë kombëtare që do vijojë deri në rrëzimin e qeverisë.
Ndërkohë nuk ka emra kush janë personat që do marrin pjesë në këto grupe pune, por mendohet se përfshihen persona dhe individë që njohin territorin ku do të punojnë.
“Do jenë individë që kanë kohë që operojnë në këto qarqe si përfaqësues të PD-së”, raportoi gazetari Xhangoli.
Ndërkohë gjatë mbledhjes, një prej anëtarëve, Lisandër Hoxha, ka paraqitur një platformë ku kërkonte përjashtimin nga radhët e PD-së personat e lidhur me Sorosin, ata që kanë fituar tendera nga qeveria si dhe ngritjen e një Komisioni Hetimor brenda partisë për mënyrën si janë marrë firmat e deputetëve për të mbështetur Endrit Shabanin si Avokat Populli.
“Duke qenë se fokusi u përqendrua te protesta, këto diskutime u shtynë për mbledhjen e radhës data e të cilës nuk është përcaktuar ende”, raportoi gazetari.
