Performanca e realizimit të investimeve publike ka lënë për të dëshiruar në dy vitet e fundit, por Ministria e Financave ka programuar të shtrëngojë monitorimin e investimeve vitin e ardhshëm.
Do të ngrihet një sistem monitorimi mujor, i cili do të verifikojë problematikën dhe do të propozojë masat për zgjidhje brenda një kohe më të shkurtër, por gjithashtu do të ketë monitorim të veçantë javor të portofolit të investimeve publike për projektet prioritare me impakt të gjerë.
Monitorim javor do të kenë veçanërisht projektet me impakt të ndjeshëm buxhetor, të cilat do të monitorohen sipas ecurisë së tyre në bazë javore, për të siguruar realizimin e tyre në terma financiarë dhe rrjedhimisht në plotësimin e objektivave të vendosura nga institucionet e linjës.
Ministria e Financave planifikon gjithashtu të rialokojë më shpesh fondet buxhetore nga projektet me performancë të ulët në projektet me performancë më të lartë, duke konsideruar edhe mundësinë e rishikimit të ligjit të buxhetit 2017 për këtë qëllim.
Në favor të nxitjes së përdorimit të fondeve buxhetore për investime Ministria e Financave planifikon të çeljen e planeve të investimeve brenda muajit janar dhe përgatitjen e dokumentacionit të prokurimit brenda muajit shkurt për projektet e reja.
Po kështu, të gjithë institucionet buxhetore do të kenë përgatitur paraprakisht listën e nevojave të tyre sa u përket investimeve prioritare, që në fillim të vitit 2017, me synim për të arritur plotësimin e kushteve dhe afateve për zbatimin në kohë të këtyre investimeve dhe për faktorizimin e tyre në ekonomi.
Për vitin 2017, investimet publike janë planifikuar në masën 4.8% e PBB ose 76 miliardë lekë (duke përfshirë këtu dhe Fondin e Zhvillimit Rajonal prej 9.5 miliardë lekë, si dhe mbështetjen buxhetore për Sektorin e Energjisë prej 1.5 miliardë lekësh). Në planifikimin e investimeve për vitin 2017 janë mbajtur në konsideratë të gjitha detyrimet kontraktuale për projektet e investimeve me financim të huaj dhe të brendshëm të trashëguara nga viti 2013 dhe më parë. Ashtu si në 2014 dhe 2015, do të ketë përparësi shmangia e detyrimeve të reja dhe mbartja e tyre në vitet e ardhshme, si dhe minimizimi i detyrimeve kontraktuale për projektet në proces zbatimi, duke u fokusuar me përparësi në financimin e projekteve në vazhdim./Monitor/a.k
