Rusia e konsideron praninë dhe aktivitetin ushtarak të NATO-s në Arktik si një kërcënim të drejtpërdrejtë për sigurinë e saj. Deklarata është bërë nga ministri i Jashtëm rus, Sergei Lavrov, në një artikull të publikuar nga Ministria e Jashtme në Moskë.
Sipas Lavrov, stërvitjet dhe aktiviteti ushtarak i Aleancës në veri të largët janë “agresive” dhe rrisin rrezikun e incidenteve që mund të çojnë në një përballje të armatosur, me pasoja potencialisht katastrofike.
Në shkurt, NATO nisi misionin “Arctic Sentry”, duke forcuar praninë e saj në rajon, në një kohë kur tensionet me Rusinë janë rritur ndjeshëm pas nisjes së luftës në Ukrainë.
Moska e sheh Arktikun si një zonë me rëndësi strategjike dhe ekonomike. Rusia disponon flotën më të madhe ushtarake në rajon, përfshirë nëndetëse të armatosura me armë bërthamore, ndërsa po zhvillon edhe rrugën detare të veriut, që synon të lidhë vendin me tregjet aziatike.
Ndërkohë, edhe Norvegjia ka zgjeruar praninë e saj ushtarake në Arktik. Në rajon po shton aktivitetin edhe Kina, kryesisht përmes bashkëpunimit me Moskën.
Rusia ka mohuar vazhdimisht se përbën kërcënim për NATO-n.
