Agjencia e Menaxhimit të Fatkeqësive të Nepalit (NDRRMA) tha se të paktën 933 punëtorë besohet se janë bllokuar në tunelet e krijuara nga ndërtimi i disa projekteve hidroenergjetike pas përmbytjeve masive dhe rrëshqitjeve të dheut.
Një nga këto objekte ndodhet në kompleksin e Trishulit të Epërm, ku autoritetet njoftuan të premten se rreth 350 persona mund të jenë të bllokuar, raporton Sky News. Një operacion i madh shpëtimi është duke u zhvilluar, ku përfshihen forca ushtarake dhe ekipe specialistësh nga India dhe Kina.
Të dielën, ushtria i transportoi makineritë me helikopter në një vendndodhje të largët dhe ekipet e shpëtimit filluan të hiqnin mbeturinat nga hyrja e njërit prej tuneleve.
“Është shumë e vështirë sepse ka shumë rrënoja dhe nuk mund të gërmojmë për të kaluar nëpër to”, tha Dharam Raj Upreti, drejtor i NDRRMA-së.
Hidrocentralet 3A dhe 3B të Trishuli-t të Epërm janë centrale të lidhura në lumin Trishuli, i cili përfshin distriktet Nuwakot dhe Rasuva, të cilat u prekën rëndë nga përmbytjet e së mërkurës. Ushtria nepaleze publikoi më parë një foto që tregonte dy burra të mbuluar me baltë pasi u nxorën nga hyrja e njërit prej tuneleve.
Zona kryesore e punës vlerësohet të jetë rreth 180 metra brenda tunelit. Arritja në të mund të japë një pasqyrë të gjendjes së atyre që kanë mbetur të bllokuar atje për gjashtë ditë. Zyra e Kryeministrit njoftoi të dielën se ekipet e shpëtimit kishin zbritur nëpër një vrimë me përmasa 0.6 x 0.9 metra, e cila po zgjerohej.
Megjithatë, deklarata thotë se deri më tani nuk ka pasur “asnjë përgjigje” nga brenda tunelit.
Përmbytjet ndodhën më 26 gusht, pasi një rrëshqitje dheu në Himalaje shkaktoi thyerjen e një akullnaje.
