Për të mobiluar shtëpinë, blerë pajisje elektronike, ikur me pushime apo për nevoja emergjente shëndetësore, shqiptarët morën 53.7 miliardë lekë ose rreth 520 milionë lekë hua nga institucionet financiare jo-banka deri në shtator të vitit të shkuar.
Në raport me 2022-shin, kredia e dhënë nga shoqëritë e kursim-kreditit u zgjerua me 7 miliardë lekë apo 15 për qind.
“Nëse e shohim me numër klientësh, rezulton që këta të fundit të kenë marrë kredi 2 apo edhe tre herë brenda një viti për shkak të afateve të shkurta të shlyerjes. Pjesa më e madhe e huamarrjes ndodh në Tiranë, pasi pikërisht këtu është e përqendruar edhe masa më e madhe e popullsisë”, u shpreh Arlinda Muja.
Të dhënat nga Banka e Shqipërisë tregojnë se tanimë, kredia e dhënë nga mikrofinanca po zë rreth 7 për qind të totalit të huave të dhëna në harkun e muajve janar-shtator 2023.
“Është konsiderueshëm. Nëse e krahasojmë me para 5 vitesh, mikrofinanca zinte 2 deri në 2 pik ca për qind dhe kjo tregon një rritje të konsiderueshme”, shtoi Muja.
Ulja e tavanit për kreditë nga mikrofinanca vlerësohet si shkak i rritjes së huamarrjes nga institucionet financiare jo-banka.
“Mikrofinanca nuk kërkon kolateral apo kushte të tjera siç bankat tregtare kanë. Ndaj shumë zgjedhin këtë formë huamarrje. Besojmë se dhe 2024-a do të jetë pozitiv për mikrofinancën”, deklaroi ekspertja.
Ndërkohë, ndryshe nga sa po ndodh me kreditë e dhëna nga bankat, normat e rritura të interesit, bashkë me krizën e çmimeve duket se kanë ndikuar në shtimin e kredive të këqija te mikrofinanca.
Huatë e papaguara në kohë në arritën në 14.9 për qind në fund të qershorit të shkuar nga 13.2 fundvitin e 2022-shit.
/a.d
