Për kë bien këmbanat?

PD po tenton të vendosë “veton e vettingut”, duke i faturuar Shqipërisë dhe shqiptarëve një kosto tepër të rëndë, pikërisht në kohën kur vendi ka kapërcyer me sukses gropat në të cilat qeveria e mëparshme e kishte zhytur. Duke e kthyer Shqipërinë dy mijë vite pas, që në kohën e Romës së Lashtë kur “Vetoja” e keqinterpretuar e PD – së sotme, vendosej nga Tribunët për të penguar marrjen e vendimeve të kundërta me interesat e Plebejasve. Vetoja e PD – së pengon marrjen e një vendimi, në pretekst të së cilës kjo parti u krijua: “Ta bëjmë Shqipërinë si gjithë Europa”.

Qesharakja në kërkesën e Lulzim Bashës për rishikimin e përkthimit gabim, të kujton fragmentin e romanit “Dimri i Madh”, në të cilin Kadare përshkruan sesi prishjen e marrëdhënieve të Enver Hoxhës me Rusinë mund ta ketë shkaktuar përkthyesi. Mbi të njëjtën ironi e lojra fjalësh, Lulzim Basha me anglishten e tij të “shqupëzuar” kërkon të imponojë prapavijën personale.

Nuk është diçka e re që hapjen e negociatave po e mban peng PD me lojrat prapa krahëve të shqiptarëve dhe me lobingjet që e dëmtojnë vendin. Ndërkohë që ligji i vettingut është i vetmi kusht për hapjen e negociatave, pse PD e ankimon në Gjykatën Kushtetuese, duke e penguar hapjen dhe ecurinë normale të negociatave? Dhe pse Gjykata Kushtetuese, për herë të parë merret me një ligj kushtetues, kur nuk ka ndodhur asnjëherë?

Ligji përcakton se procesi i rivlerësimit për prokurorët dhe gjyqtarët kryhet mbi bazën e tri kritereve: Së pari, vlerësimin e pasurisë; së dyti, kontrollin e figurës; dhe së treti, vlerësimin e aftësive profesionale. Perandoria mbi të cilën kanë ngritur jetesën gjyqtarët, figura e të korruptuarit që ata e mbajnë si njollë mbi supe dhe përvoja e ngritur nga kurse gjashtë mujore, janë pa dyshim ngërçet pse sistemi i drejtësisë nuk e dëshiron drejtësinë. Edhe më naivët mund ta kuptojnë lehtësisht se me anë të ligjit të vettingut do largohej njëherë e përgjithmonë gangrena që e ka paralizuar për vite me rradhë sistemin e drejtësisë në Shqipëri. Dhe është pikërisht lidhja e ngushtë e PD – së me klanet të cilat ka krijuar brenda sistemit të drejtësisë, që e pengon ta votojë ligjin e vetingut dhe t’i hapë dritën jeshile të ardhmes europiane të vendit.

Sado paradoksal dhe absurd të duket formulimi tekanjoz e aspak i denjë për nivelin e një lideri dhe te një parti politike, ison e Lulzim Bashës po e dirigjon harmonishëm Gjykata Kushtetuese, duke përbërë një skandal, skandalin e të qenit palë e një partie në dëm të një interesi kombëtar.

Por, Gjykata Kushtetuese ka në dorë mundësinë më të mirë për të kapërcyer mbi hendekun që vetë ka krijuar. Ka në dorë të tregojë profesionalizmin, duke mos u politizuar, por duke qenë palë e drejtësisë në emër të së cilës çdo gjyqtar është betuar mbi Kushtetutën e këtij shteti. Nëse vendimi është lënë në mirëbesimin e Venecias, le të hedhin hapin e rradhës, duke treguar se ky sistem ka ende shpresë për të qenë i lirë në marrjen e vendimeve që i shërbejnë të ardhmes së Shqipërisë. E ardhmja e Shqipërisë është rruga drejt Europës; dhe vetëm ata që e duan këtë rrugë do hapin rrugën duke parë përtej interesave të ngushtë dhe afatshkurtër. Lexo.al