Për herë të parë në historinë e kishës katolike, një papë hap “Derën e Shenjtë” në një burg. Këtë e bëri Papa Françesku, në një nga komplekset më të mëdha të burgjeve në Itali. Ati i Shenjtë kaloi Derën e Shenjtë në këmbë dhe jo me karrocë, siç ndodhi në Bazilikën e Shën Pjetrit.
“Derën e parë të Shenjtë e hapa për Krishtlindje në Shën Pjetër , por doja që Dera e Dytë e Shenjtë të hapej këtu, në një burg. Doja që të gjithë ne këtu, brenda dhe jashtë, të kishim mundësinë të hapnim dyert e zemrave tona dhe të kuptonim se shpresa nuk zhgënjen”, tha Papa Françesku.
Papa Françesku hapi Vitin e Shenjtë Katolik, të njohur gjithashtu si Jubile, të martën e 24 dhjetorit. Një jubile katolik konsiderohet një kohë paqeje dhe faljeje, ndërsa këtë vit i është kushtuar temës së shpresës.
Vitet e shenjta ndodhin zakonisht çdo 25 vjet dhe përfshijnë hapjen në Romë të katër “Dyerve të Shenjta”, të cilat simbolizojnë derën e shpëtimit për katolikët. Dyert, të vendosura në bazilikat papale në Romë, janë të hapura vetëm gjatë viteve jubilare.
Ati i Shenjtë ka treguar vëmendje të veçantë për të burgosurit gjatë kohës së tij si Papë. Ai viziton shpesh burgjet në Romë dhe në udhëtimet e tij jashtë vendit.
