Nuk po reshtin rastet e burrave dhe pleqve maniakë dhe perversë në të gjithë vendin.
Një tjetër rast u denoncua në Peqin, kur prindërit e një të miture i kallëzuan policisë lokale se vajza e tyre ishte abuzuar nga një plak i lagjes.
Policia e qarkut Elbasan dha sot një informacion paraprak mbi ngjarjen, por nuk konfirmon ndalimin e të dyshuarit, pasi kjo mbetet në dorën e Prokurorisë së Rrethit Gjyqësor Elbasan ku u dërguan që prej datës 19 shtator materialet për ndjekje të mëtejshme.
Nga hetimet e para dhe denoncimi i babait të 15-vjeçares M.P., banuese në fshatin Papër të rrethit Peqin, bëhet e ditur se vajza është abuzuar nga plaku vendas.
Një zyrtar policor lokal i tha NOA-s se si i dyshuari dhe vajza jetojnë në një lagje të fshatit Papër dhe njiheshin për shkak të afërsisë së banimit.
Ditën e hënë, teksa vajza e mitur ishte duke ecur në rrugët e fshatit, është ndaluar nga plaku. Në rrethana që nuk qartësohen, i moshuari dyshohet se ka abuzuar me shtetasen M.P, 15 vjeçe, banuese në fshatin Papër.
Zyrtarisht, Policia e Shtetit komunikoi se “më datë 20.09.2016, u referuan materialet në Prokurorinë e Rrethit Gjyqësor Elbasan, për shtetasin P.D, vjeç 73, banues në Peqin, pasi më datë 19.09.2016, në fshatin Papër, dyshohet se ka kryer marrëdhënie seksuale me shtetasen M.P, vjeç 15, banuese në fshatin Papër”. Në një përditësim të fundit, Policia e Shtetit e kualifikoi abuzimin e të dyshuarit si kryerje veprash të turpshme. /noa.al/a.k
