Një në tre aplikantë ka përfituar nga kredia me zero interes nga Forcat e Armatosura. Lajmin e dha ministri i Mbrojtjes, Niko Peleshi, gjatë ceremonisë për akordimin e kredive të buta për strehim. Në fjalën e tij, Peleshi theksoi se janë pranuar 92 aplikantë dhe kjo do të vazhdojë deri në plotësimin e të gjitha nevojave për strehim të personelit ushtarak.
“Janë pranuar 92 aplikantë. Një në tre aplikantë është përfitues. Kjo do të vazhdojë deri sa të plotësojmë nevojat për strehim të personelit ushtarak. 34 vjeç është mosha mesatare e përfituesve”.
Ai mbështeti kërkesën e ministrit Balla për rritjen e moshës së përfituesve dhe tha që edhe mosha e rekrutimit në Forcat e Armatosura do të rritet nga 27 në 30 vjeç.
“Edhe unë jam dakord me kërkesën Ministrit të Brendshëm që mosha e përfituesve të rritet nga 40-45 vjeç, se kemi pasur disa të skualifikuar për shkak të moshës dhe çuarja në 45 vjeç do të rrisë numrin e përfituesve nga kjo skemë. Ashtu si pranimi në FA ka një limit në 27 vjeç, me ndryshimet e reja do të shkojë në moshën 30 vjeç”.
Ministri renditi edhe disa nga përfitimet e deritanishme të ushtarakëve, nga rritja e pagës te trajtimet shëndetësore dhe trajnimet për rritjen në karrierë.
“Rritje me 40% të vitit të kaluar të pagave, rritje historike që kanë çuar pagën e tyre në nivelet më të larta në rajon dhe kjo do të vazhdojë deri sa të shkojmë në hapësirën e vendeve të NATO-s. Trajtim shtesë për vështirësi dhe raste të veçanta. Pagesë papunësie për bashkëshorten kur humbin vendin e punës gjatë transferimit. Fëmijët nën 18 vjeç u lind e drejta për të përfituar trajtim financuar. Mjekët e ushtarakët tanë trajtohen me trajtim mjekësor për raste të veçanta si në Turqi ku ka marrëveshje për të trajtuar 100 ushtarakë në vit. Hapje e një laboratori modern mikrobiologjik për të trajtuar falas të gjithë personelin mjekësor pranë Spitalit të Traumës. Fëmijët e ushtarakëve të rënë në krye të detyrës përjashtohen nga pagesa e shkollë, kanë prioritet në shtëpitë e pushimit të ushtarakëve. Trajtohen me pagesë dhe studentët që në moshën 18 vjeç jo vetëm që shkollën e kanë falas, por marrin edhe pagën bazë. I gjithë personeli ushtarak përfitues i kurseve dhe trajnimeve të zhvilluara jashtë vendit për rritjen e tyre në karrierë”.
/a.r
