Partia Drejtësi Integrim dhe Unitet mbajti ditën e sotme një ceremoni në nder të 31-vjetorit krijimit të “Shoqatës Çamëria”.
Në fjalën e tij, kreu i PDIU-së Shpëtim Idrizi, theksoi se krijimi i shoqatës është një moment kyç për çështjen e çame pasi e riktheu atë pas më shumë se 4 dekadash. Sipas tij, Shoqata u krijua disa ditë pas krijimit të Partisë Demokratike dhe kishte vokacion anti-komunist.
“Vetëm disa ditë pas krijimit të Partisë Demokratike, anëtarët e “Shoqatës Çamëria”, të cilëve i jemi shumë mirënjohës, krijuan shoqatën e parë patriotike Çamëria, të bashkuar në një vokacion me anti-komunizmin.
Është detyra jonë që t’i rikujtojmë ata burra që e risollën çështjen çame. Nëse gjenocidi grek që kulmoi me masakrën e Napoleon Zervën që i vrau fizikisht dhe i shpërnguli nga trojet e tyre çamët, regjimi i Enver Hoxhës tentoi t’i vriste ata moralisht.
Prandoj sot është dita që të kujtojmë dhe vlerësojmë të gjithë kryetarët e “Shoqatës Çamëria”, nga Abaz Dojaka dhe deri te Hektor Sejko për punën që ata bënë në kushte të vështira. Them në kushte të vështira pasi atë kohë ishte shumë e vështirë ta riktheje çështjen çame, të bëje një artikull në gazetë për dhe jo më ta bëje çështje të ditës.
Pjekuria e atyre burrave shtroi udhën tonë për të kërkuar të drejtat e shqiptarëve të Çamërisë”, tha Idrizi./m.j
