Partia Demokratike ka reaguar në lidhje me daljen në publik të kandidatit të mazhorancës Erion Veliaj për bashkinë e Tiranës, gjatë një takimi mes tij dhe sindikatës së Transportit Publik.
Nga selia blu, Reila Bozdo e cilësoi Veliajn si një mashtrues të paskrupullt. Sipas saj, Veliaj është gati të shesë në rastin më të parë edhe krijuesin e tij, Edi Rama, për të bërë karrierë.
“Erion Veliaj, një personazh i pabesueshëm dhe i shtirur foli edhe sot pa ndalim, por sot i shpëtuan 4 fjali. 4 herë atij i shpëtoi se ishte dakort me Halim Kosovën. Të jesh dakort me Halim Kosovën është në të vërtetë drejtimi i duhur. Eshtë mirë të jesh dakort me Halim Kosovën, si çdo qytetar tjetër i Tiranës, sepse Halim Kosova ka hyrë në një garë për t’u shërbyer banorëve, e jo për t’u marrë me politikë. Halim Kosova është shembull për t’u ndjekur, sepse ka arritur gjithçka me punë e meritë. Halim Kosova është krejt e kundërta e një mashtruesi të paskrupullt si Erion Veliaj që është gati të shesë në rastin më të parë edhe krijuesin e tij, Edi Rama, për të bërë karrierë. Qytetarët e Tiranës dinë mirë ta dallojnë të mirën nga e keqja, të vërtetën nga kallpi, të drejtën nga hileja, të ndershmin nga abuzuesi.” tha Bozdo
Redaksia Online
(JavaNews.al)
