Partia Demokratike ka një problem serioz me legjitimitetin e Endri Shabanit si Avokat i Popullit. Aq serioz, sa zgjedhjen e tij e ka çuar në Gjykatën Kushtetuese dhe në Kuvend deputetët e opozitës i bllokuan foltoren për të mos e lejuar të raportonte. Por duket se ky problem ka edhe përjashtime.
Njëri prej tyre quhet “Smart City”.
Kërkesa nuk është aspak simbolike. PD kërkon të hetohet nëse sistemi cenon jetën private dhe të dhënat personale, nëse mundëson profilizimin e qytetarëve dhe nëse mund të ndikojë mbi lirinë e shprehjes, protestën, aktivitetin politik apo median.
Opozita kërkon gjithashtu inspektimin e Qendrës së Komandës, sigurimin e kontratave dhe dokumentacionit teknik, marrjen e informacionit nga institucionet përgjegjëse, ekspertizë të pavarur dhe publikimin e një raporti të posaçëm. Mes kërkesave është edhe pezullimi i funksioneve biometrike dhe profilizuese deri në garantimin e një kuadri të përshtatshëm ligjor.
Dhe Endri Shabani është përgjigjur.
Më 6 gusht, Avokati i Popullit ka njoftuar PD-në se ka vendosur nisjen e hetimit administrativ. Për çështjen është ngritur një grup pune me tre ndihmëskomisionerë, nën drejtimin e Komisionerit të Seksionit për Policinë, Besnik Deda, ndërsa mund të angazhohet edhe ekspertizë e jashtme e pavarur.
Por Shabani duket se e ka shijuar disi paradoksin e letrës që i kishte mbërritur.
Pa hyrë në polemikë, në përgjigjen e tij ai vlerëson “në mënyrë të veçantë” faktin që PD i është drejtuar Avokatit të Popullit “si garanti i pavarur i të drejtave dhe lirive themelore”.
“Në përgjigje të besimit tuaj tek legjitimiteti dhe tek pavarësia e Avokatit të Popullit për të hetuar këtë çështje…”
Një falënderim protokollar në letër, por me një ironi që është e vështirë të mos lexohet mes rreshtave. Partisë që kundërshton zgjedhjen e tij në Kushtetuese, Shabani i përgjigjet duke e falënderuar për besimin te legjitimiteti.
Në fakt, historia ngjan jo pak me marrëdhënien e Sali Berishës me SPAK-un. Prokuroria e Posaçme telendiset thuajse çdo ditë si institucion i kapur dhe politik, por po asaj i kërkohet llogari pse nuk heton denoncimet e opozitës.
Ky është edhe thelbi i çështjes. Institucionet nuk mund të funksionojnë me legjitimitet me raste: të pavlefshme kur të hetojnë apo të kundërshtojnë dhe të pavarura kur u kërkon të hetojnë tjetrin. Përndryshe, problemi nuk është më se sa të pavarura janë institucionet, por sa të dobishme janë ato në betejën politike të ditës.
/VNA
