“Sot shqiptarët kanë parë me zë dhe figurë sesa e pafuqishme është qeveria e Edi Ramës për të luftuar me të vërtetë bandat dhe zyrtarët e lidhur me to”.
Kështu tha në një dalje për mediat ish-deputeti demokrat Enkelejd Alibeaj.
Ai deklaroi se nëpërmjet qëndrimeve burracake të kryeministrit dhe zëvendëskryeministrit, shqiptarët panë sot një qeveri që ka frikë t’i përmendë emrin një bande për llogari të së cilës, si Edi Rama dhe Erjon Braçe denoncuan se punon prokurori i Durrësit, Arjan Ndoja.
Sipas tij, ajo që presin sot qytetarët shqiptarë nuk është a ka Erjon Braçe lidhje gjaku me drejtorin e arrestuar të Kadastrës. Kjo nuk ka pikë rëndësie për çështjen në fjalë.
Alibeaj tha se dje dhe sot, Erjon Braçe, bashkë me Edi Ramën, i bënë presion drejtësisë në sallën e gjyqit për të mbrojtur një zyrtar të emëruar nga vetë ata dhe që akuzohet për shpërdorim detyre nga një prokuror, “që është në shërbim të bandave të Durrësit”.
Në këtë linjë shtoi se ajo që prisnin sot shqiptarët nuk ishte refreni i propagandës bajate se “fajin e ka opozita” dhe se shqiptarët prisnin sot, që Edi Rama të bënte kryeministrin dhe të kërkonte arrestimin e prokurorit që i shërben bandave, si dhe nxjerrjen para drejtësisë të këtyre bandave, të cilat ai i njohka, por nuk ua përmend emrin.
Për ish-deputetin demokrat është urgjente që Edi Rama të përgjigjet për disa pyetje që sipas tij sot ia bën çdo shqiptar:
-Cilës bande të Durrësit i shërben prokurori Arjan Ndoja?
-Prej sa kohësh Edi Rama është në dijeni të faktit që Arjan Ndoja punon për bandat dhe jo për shtetin?
-Pse heshti Edi Rama dhe Erjon Braçe deri më sot dhe nuk dolën përpara se të arrestohej njeriu i tyre në Kadastrën e Durrësit?
-Pse nuk e arreston prokurorin që i shërben bandës dhe bandën që mbështet prokurorin?
Ai tha në mbyllje se këtyre pyetjeve Edi Rama duhet t’u japë përgjigje menjëherë dhe se pjesëmarrja e paprecedente e një zëvendëskryeministri në një seance gjyqësore dhe shantazhi publik nuk i shërben as ligjit, as të vërtetës, as drejtësisë, por se “Ajo është vetëm propagandë që mbron bandat, me të cilat Edi Rama blen vota dhe mban në këmbë pushtetin e tij”.
/a.r
