Akuzat politike mes opozitës dhe mazhorancës kanë vijuar edhe gjatë pasdites së të martës. Këtë herë kanë qenë vetë Lulzim Basha dhe Edi Rama që kanë zgjedhur të shkëmbejnë replika në Twitter.
Kreu i PD, Lulzim Basha përmes një statusi në Twitter, shkruan se kryeministri ka ndezur motorët e propagandës me shpifje dhe përbaltje për të mbrojtur pushtetin.
Ai shkruan se Rama, tashmë po përdor të gjithë shërbëtorët dhe mercenarët e tij për të shpifur dhe baltosur ndaj opozitës.
“Propaganda e Ramës i ka ndezur të gjithë motorrët. Shpifje e përbaltje për të mbrojtur pushtetin dhe paratë nga të gjithë shërbëtorët e mercenarët e Padronit dhe klientëve të tij. Hendeku midis oborrit të Ramës dhe njerëzve të thjeshtë do të thellohet. Unë jam në anën e njerëzve!” – shkruan Basha.
Por nuk ka vonuar shumë dhe kreu i mazhorancës i është përgjigjur duke u shprehur se PD po vepron si parti gjobëvënëse.
“Kur një parti politike shpall si platformë dhunën verbale mbi sipërmarrësit ka ngatërruar sistemin ku vepron; ka harruar arsyen pse ekziston; ka marrë fund si alternativë qeverisëse e është kthyer në maskë gjobvënëse! Kur këtë parti pastaj e drejton LB ferra e ka marrë fare uratën” – shkruan Edi Rama.
Pak orë më parë, Basha publikoi një listë me biznesmenë, të cilëve thotë se do t’ua sekuestrojë pasuritë.
Basha tha se do bëjë disa amendime në ligjin “Anti-mafia”, që u lënë barrën e provës këtyre biznesmenëve të tregojnë se si i kanë bërë paratë. Në të kundërt, sipas Bashës, ata do të përballen me sekuestrimin e pasurive.
/JavaNews/b.d
