Debate të ashpra e nervozizëm në mbledhjen e degës së Partisë Demokratike të Shkodrës, në analizën e saj për humbjen e zgjedhjeve të 21 qershorit. Anëtar të PD të njësisë administrative Guri Zi, ish-komunë që tashmë është pjesë e bashkisë Shkodër kanë kërkuar në fillim të kësaj mbledhje që të marrin fjalën. Por kreu i PD-së në Shkodër, Ramiz Çobaj u ka kërkuar të dalin jashtë pasi në mbledhje duhet të ishin anëtarët e kryesisë
“Shqetësimet tuaja mund t’i përcillni përmes kryetarit dhe sekretarit të grupseksionit apo anëtarit të kryesisë që mund të keni”, ka thënë Çobaj.
Si kundërpërgjigje Pjetër Marku ka thënë se shqetësimet janë përcjellë por asnjë nga ato nuk është dëgjuar.
“Nuk kemi ardhur as për të bërë zhurmë apo rrëmujë, nëse jemi tepër këtu dalim për dere dhe kryejmë punë… T’i themi dy muhabete dhe dalim përjashtë. Ne nuk kemi ardhur këtu as prej Serbie e as prej Kosove”, është shprehur ai.
Kjo përplasje ka bërë që një tjetër anëtar i PD-së në Shkodër, Aleks Maka, të braktis mbledhjen. Ndërsa Marku ka vijuar duke thënë: “Ka 4 muaj që kanë mbaruar votimet dhe na bën zhele kryetari i partisë socialiste në Gurin e Zi. Nëse ne kemi votuar që të rrinë ata aty atëherë ne jemi tepër këtu”.
Në analizën e punës së PD Shkodër morën pjesë dhe nënkryetari i PD Edi Paloka koordinatorët Arben Imami dhe Gjokë Uldedaj, deputetët e qarkut dhe sekretarin për burimet njerëzore Bardh Kadilli.
Në përfundim të mbledhjes nënkryetari i PD-së Edi Paloka duke iu përgjigjur medias mbi mungesën e Jozefina Topallit tha: “Nuk mund të them gjë. Jozefina është ish-kryetarja e parlamentit, deputete e nderuar e PD”. Ndërsa për faktin se ajo është edhe pjesë e kryesisë në PD-në e Shkodrës Paloka shton se ”Kjo është çështje e kryesisë së PD-së së Shkodrës dhe nuk është problem”.
