Parita Demokratike reagon pas videos së publikuar nga kryeministri Edi Rama në “Facebook”, i cili thoshte se janë pamje nga Spanja, ku policët ushtronin dhunë ndaj atyre që nuk zbatonin masat kundër koronavirusit.
Në një deklaratë për media, PD thekson se videoja nuk është e Spanjës, por e dhunës policore kundër opozitës në Algjeru, por që Rama e shpërndan për të përhapur panik.
“Edi Rama, burim kryesor paniku. Dhunën policore kundër opozitës në Algjeri i prezanton si masa të Spanjës për të luftuar COVID 19“, bën me dije PD.
Për Partinë Demokratike, sot Edi Rama ka shpërndarë një gënjeshtër të rrezikshme për t’i trembur edhe më shumë qytetarët e Shqipërisë.
Më tej nënvizohet se në Spanjë situata është e rënduar, por një shtet demokratik i Bashkimit Europian nuk vepron kurrë me dhunë ndaj shtetasve të vet, siç gënjen dhe mashtron Edi Rama.
“Ai është sot burimi kryesor i panikut dhe pasigurisë në Shqipëri. I gjendur i papërgatitur, pa ide dhe në majë të një qeverie të kalbur nga skandalet dhe korrupsioni, ai ka dështuar të qetësojë dhe të kompensojë njerëzit, si dhe të menaxhojë një karantinë të efektshme. Paradite detyron qytetarët të dynden në dyqane, në drekë i terrorizon me video nga protestat antiqeveritare kundër regjimit autoritar në Algjeri, duke e shitur atë si dhunë që ndodh rëndom në Bashkimin Europian. Kjo është papërgjegjshmëri”, thuhet në deklaratën e PD.
Partia Demokratike i bën thirrje Edi Ramës të dalë nga shtëpia dhe të bëjë detyrën, t’u japë fund mesazheve që përhapin panik tek qytetarët dhe të përqendrojë të gjithë vëmendjen e tij tek detyrat e Qeverisë për të parandaluar përhapjen e virusit dhe për të zgjidhur krizën social-ekonomike që ka krijuar situata.
Partia Demokratike i bën edhe njëherë apel të fortë çdo qytetari të ndjekin me seriozitet dhe përgjegjshmëri masat e kufizimit të lëvizjes dhe distancimit social.
“Zbatimi rigoroz i këtyre masave është me rëndësi JETIKE për të mbrojtur veten dhe njerëzit tanë më të dashur”, thuhet në mbyllje.
g.kosovari
Zoti Rama nuk ka genjyer ,s’besoj fare