Partia Demokratike përmes Sekretares së saj për marëdhëniet me publikun, Grida Duma, ka hedhur akuza drejtuar nënkryetares së kuvendit, deputetes Socialiste Valentina Leskaj, duke thënë se djali i saj ka marrë para nga OSHEE, për një trajnim të punonjësve. Bëhet fjalë Besnik Leskaj, kjo pasi PD denoncoi disa ditë më parë edhe djalin tjetër të nënkryetares së kuvendit duke thënë se kishte fituar tenderin për linjën e transportit hekurudhor të naftës.
“Pikërisht nga paratë e gjakut të shqiptarëve të mbledhura me dhunë e me kërbaç, me burg, kryehajduti i Edi Ramës, Ardian Çela, i jep paratë paratë e të pamundurve djalit tjetër të zonjës Leskaj, për mirë trajtimin ndaj stresit, për punonjësit e OSHEE.
700 milionë lekë merr djali i deputetes, i nënkryetares së Kuvendit, për të trajtuar stresin e OSHEE, ndërkohë që kjo bandë e Edi Ramës shkaktoi tronditje e dramë tek mijëra familje, tek mijëra të pamundur, duke i lënë në errësirë, duke i dërguar në burgje duke u marrë dhe jetën nga arroganca e trajtimi çnjerëzor.
Ja ku janë dokumentat.
700 milionë lekë për ABKONS, për Besnik Leskaj, për një trainim 4 mujor të punonjësve.
175 milionë lekë në muaj, ose afërsisht 6 milionë lekë në ditë i jep Edi Rama djalit të zonjës Leskaj, nga paratë e gjakut të shqiptarëve të marra me dhunë e me kërbaç prej OSHEE-së.
Fondi limit ishte 720 milionë lekë, dhe ofertuesi i vetëm është djali i tjetër i zonjës Leskajt me 700 milionë lekë. Gjithçka e mirëkalkuluar që paratë të ndahen, të shkojnë sipas porosisë së shefit të madh.
Ju kujtojmë se për zonjën Leskaj ka një kërkesë në Kuvend për mbarimin e mandatit, pasi djali tjetër i saj ka marrë hekurudhën Ballsh-Fier-Vlorë për 25 vjet, dhe kjo e bën mandatin e deputetes së Ramës të pavlefshëm, sipas Kushtetutës.
E keni dëgjuar Edi Ramën që thotë shtet, shtet, po bëjmë shtet.
Ky pra është shteti i Edi Ramës.
Shteti më i korruptuar në ballkan, më i pamëshirshëm i ngritur nga kryeministri më i korruptuar në Ballkan.” Përfundon fjalën Grida Duma.
