Kemi një numër faktesh që provojnë fleksibilitetin e plotë të PD gjatë procesit të negocimit dhe dialogut jo vetëm me palët politike por edhe me partnerët ndërkombëtarë. Kështu e ka nisur fjalën e tij deputeti demokrat Oerd Bylykbashi në konferencën për shtyp ku publikoi letërkëmbimet me OPDAT dhe Euralius.
Ai tha se e vetmja pikë që e ndan PD me draftin është çështja themelore për moskapjen e sistemit të drejtësisë që është modeli sesi do te emërohen funksionarët.
“Më datë 10 shkurt përmes një e-maile na janë paraqitur alternative nga OPDAT dhe Euralius për çështjen e modelit të emërimit të zyrtarëve të lartë. Midis këtyre modeleve të mbështetura nga politika e vendeve aleate, PD zgjodhi modelin e vendeve të rezervuara ku dy zgjidhen nga mazhoranca dhe 2 zgjidhen nga kandidatura profesionistësh të mbështetura nga opozita dhe anëtari i pestë zgjidhet nga shoqëria civile” – tha Bylykbashi duke prezantuar e-mailet në monitor.
Ndërkohë, nënkryetari i Komisionit të Reformës bëri publik edhe përgjigjen e Halimti ku thuhet se model ii vendeve të rezervuara është më i përshtatshmi dhe më pak i komplikuari.
“Më pas, këto kanë vijuar me raportin final të Komisionit të Venecias i cili në mënyrë specifike përcakton në paragrafin 17 se kandidatët do të përzgjidhen nga mazhoranca dhe listë e opozitës. Nga kjo listë do të përzgjidhen 3 dhe nga opozita do të përzgjidhen 2” – tha nënkryetari i Komisionit të Reformës nga selia e PD.
Sipas tij, më 21 prill, pas daljes së raportit të Venecias, ekspertët ndërkombëtarë bënë një komunikim të fundit me PD ku kjo e fundit rikonfirmon modelin e zgjedhjes së zyrtarëve të lartë.
“Në takimin e datës 6 qershor kemi bërë të qartë se zgjedhim modelin e vendeve të rezervuara, model ky që nuk u kundërshtua në parim. Këto fakte të bëra tashmë publike vërtetojnë katërcipërisht fleksibilitetin maksimal të PD në procesin e dialogut dhe të konsensusit” – tha Bylykbashi. (java / r.a)
