Deputeti demokrat Luçiano Boçi ka akuzuar Kryeministrin Edi Rama si personin përgjegjës për shkallën e madhe të përmbytjeve në të gjithë vendin, pasi sipas opozitës, kreu i qeverisë, fondet për kanalizimet i çoi në xhepat e klientelës së tij. Deputeti i PD e ka cilësuar Ramën si kryeministrin fatkeqësi, i cili brenda dy viteve qeverisje ka heëur nga fondet për rregullimin e kanalizimeve miliona dollarë
“Çdo banor i Bregut të Matit, i Torovicës, i Ishmit, i Sukthit, i Shijakut, i Çermës, çdo banor i Rrrogozhinës, fshatrave të Elbasanit, të Lushnjës, Fierit, Dibrës, çdo i përmbytur këto ditë nga Veriu në Jug, duhet ta dijë se fatkeqësia natyrore nuk do të ishte kaq dramatike nëse nuk do të ekzistonte fatkeqësia tjetër më e rëndë, që quhet Edi Rama. Sapo erdhi në pushtet, Edi Rama hoqi 2.5 milionë dollarë për kanalizimet, ose 30 përqind të gjithë fondit.
Në shtator të vitit 2014, pikërisht para sezonit të reshjeve, Edi Rama hoqi 4.9 milionë dollarë për kanalizimet, ose e shkurtoi fondin me 40 përqind.
Në fund të vitit që kaloi, zhduku sërish 4.2 milionë dollarë që ishin të destinuara për kanalizimet. Ndërkohë që në fushatë, Edi Rama premtoi se asnjë pëllëmbë toke nuk do të përmbytej më dhe tha se do të investonte 160 milionë dollarë për kanalizimet.
Me të gjitha aktet e tij, ka treguar se është bashkautor i përmbytjeve dramatike. Dhe është shfaqur gjithnjë pasi ka dalë dielli, ose pasi është kthyer prej pushimeve luksoze.”- tha demokrati.
